ბოლო ერთი კვირის განმავლობაში COVID-19-ის B.1.617.2 შტამი, რომელიც თავდაპირველად ინდოეთში გამოვლინდა და ჯანდაცვის მსოფლიო ორგანიზაციის ახალი კლასიფიკაციით “დელტა” ეწოდა, სულ მცირე, 185 ქვეყანაში და ტერიტორიაზეა დაფიქსირებული. ამის შესახებ ჯანდაცვის მსოფლიო ორგანიზაციის ყოველკვირეულ ეპიდემიოლოგიურ ბიულეტენშია აღნიშნული.
”185 ქვეყანამ და ტერიტორიამ, მათ შორის რამდენიმე ახალმა, “დელტა” ვარიანტით ინფიცირების შემთხვევების შესახებ განაცხადეს”, – აღნიშნული დოკუმენტში.
ამასთან, იზრდება დანარჩენი შტამების გავრცელების მაჩვენებელიც. “ალფა” შტამი, რომელიც პირველად დიდ ბრიტანეთში გამოვლინდა, 193 ქვეყანაში ვრცელდება. ვარიანტი “ბეტა” (სამხრეთ აფრიკიდან) 142 ქვეყანაში ცირკულირებს. ბრაზილიური “გამა” კი 96 ქვეყანაში გავრცელდა.
13-19 სექტემბრის პერიოდში მსოფლიოში COVID-19-ის 3 671 232 შემთხვევა გამოვლინდა, 59 839 ადამიანი გარდაიცვალა.
ინფიცირების უმეტესი შემთხვევა ბოლო ერთი კვირის განმავლობაში დაფიქსირდა აშშ-ში (1,017,644, წინა კვირის ანალოგიურად), ინდოეთში (211,242, შემცირება 15%-ით), დიდ ბრიტანეთში (203,077, შემცირება 21%-ით), თურქეთში (183,962, ზრდა 16%-ით) და ფილიპინები (141,525, იგივე, რაც გასულ კვირას).
Worldometer–ის მონაცემებით, 22 სექტემბრისთვის, მსოფლიოში კორონავირუსით ინფიცირების 230,413,608 შემთხვევა დაფიქსირდა. ამასთან, 4,724,756 ადამიანი გარდაიცვალა, 207,163,792 გამოჯანმრთელდა.
კომენტარები