ალეკო ელისაშვილი ჩანაწერებზე: ღარიბ ქვეყნად დავრჩებით მანამ, სანამ არჩევნების წინ ყოველ ჯერზე მოვისმენთ ამ საზიზღრობას

ღარიბ ქვეყნად დავრჩებით მანამ, სანამ არჩევნების წინ ყოველ ჯერზე მოვისმენთ ამ საზიზღრობას. სამწუხაროა, რომ ეს მოქმედებს ამომრჩევლებზე, თორემ ნორმალურ ქვეყნებში წინასაარჩევნო დებატებზე ასეთ სიბინძურეზე არ ლაპარაკობენ, – ამის შესახებ ტელეკომპანია „იმედის“ გადაცემაში „არჩევნები 2021“ პარტია „მოქალაქეების“ ლიდერმა, ალეკო ელისაშვილმა განაცხადა.

„საშინელებაა, რომ ამ ჭუჭყის გარეშე არ შეგვიძლია არჩევნების ჩატარება. ღარიბ, პრობლემებით სავსე ქვეყანაში ვცხოვრობთ, ხალხს მხოლოდ ქვეყნიდან წასვლა და სამსახურის შოვნა უნდა. იტალიაში უკვე ისეთი რეგიონია, სადაც მხოლოდ ქართულად ლაპარაკობენ, ნახევარი საბერძნეთი ქართველები ვართ და გაქცევაზე ვართ ყველანი. ყოველ არჩევნებზე უნდა იყოს იდეების ჭიდილი – ვის რა უკეთესი იდეა აქვს, რომ ქვეყანა წინ წაიყვანოს. მაგალითად, ავარიულ სახლებზე მიდიოდეს დებატები, როგორ გავამაგროთ სახლები ისტორიულ ქალაქში, „ხრუშოვკების“ პრობლემა როგორ მოვაგვაროთ, მტკვარი დაბინძურებულია, ჰაერი შხამიანია. ამის ნაცვლად იმაზე ვსაუბრობთ, რომელმა მეუფემ ვის რა უთხრა, იმან რამდენი ჩაურიცხა – მართალია ეს, არაა მართალი – მიდის ამ ჭუჭყზე ლაპარაკი. სინამდვილეში ამიტომ ვრჩებით ასეთ ღატაკ ქვეყნად. ჩანაწერებზე პასუხისმგებლობა მთლიანად ეკისრება ხელისუფლება – ან რატომ უსმენდნენ, ან რატომ ჟონავს, ან რით არიან საერთოდ სუსში დაკავებულები, როცა მტრული ქვეყანა ნახევრად შემოსულია საქართველოში. ჩვენ რომ ნორმალური ქვეყანა ვიყოთ, დაიწყებოდა გამოძიება – ავთენტურია თუ არა ეს მასალა. თუ ავთენტურია, მაშინ ვინ აგროვებდა ამ ჩანაწერებს, რატომ იხარჯება სახელმწიფო რესურსი რაღაც სისულელესა და სიბინძურეზე, მაშინ როცა სუსი დაკავებული უნდა იყოს კონტრდაზვერვით, დასდევდეს უცხო ქვეყნის აგენტურას. ღარიბ ქვეყნად დავრჩებით მანამ, სანამ არჩევნების წინ ყოველ ჯერზე მოვისმენთ ამ საზიზღრობას. სამწუხაროა, რომ ეს მოქმედებს ამომრჩევლებზე, თორემ ნორმალურ ქვეყნებში წინასაარჩევნო დებატებზე ასეთ სიბინძურეზე არ ლაპარაკობენ“, – განაცხადა ელისაშვილმა.