ალექსანდრე ჟღენტი გარდაიცვალა

ქართველი კინორეჟისორი, სცენარისტი, პუბლიცისტი, პოლიტიკური და საზოგადო მოღვაწე, ალექსანდრე ჟღენტი გარდაიცვალა. ამის შესახებ ინფორმაციას სოციალურ ქსელში საქართველოს კინოაკადემია ავრცელებს.

“საქართველოს კინოაკადემია ღრმა მწუხარებით იუწყება, რომ გარდაიცვალა ალექსანდრე ჟღენტი – კინორეჟისორი, სცენარისტი, პუბლიცისტი, პოლიტიკური და საზოგადო მოღვაწე, აფხაზეთის ხელოვნების დამსახურებული მოღვაწე – დიდი ერუდიციის მქონე, გამორჩეულად ნიჭიერი და განსხვავებული ხედვის ადამიანი და ხელოვანი.

ბატონი ალექსანდრე კიევის ი. კ. კარპენკო-კარის სახელობის თეატრისა და კინოს ინსტიტუტის კინოსარეჟისორო ფაკულტეტის დამთვრების შემდეგ მოღვაწეობდა კინისტუდია „ქართულ ფილმში“, იყო საქართველოს კინემატოგრაფისტთა კავშირის წევრი (1978-1982 წლებში – ამავე კავშირის ახალგაზრდა კინემატოგრაფისტთა სექციის თავმჯდომარე), წარმატებით მუშაობდა მხატვრულ და დოკუმენტურ კინოში, შექმნა ორიგინალური კინემატოგრაფიული ხედვით, პატრიოტული სულისკვეთებით და პოლიტიკური სითამამით გამორჩეული მხატვრული ფილმები „მონადირე“, „ცოტნე დადიანი“ (ორგინალური სცენარით დადგმული პირველი ქართული ისტორიული ფილმი), „ამბავი აფხაზი ჭაბუკისა“, მრავალი საერთაშორისო პრიზით დაჯილდოებული საავტორო დოკუმენტური ფილმები: „სტადიონი“, „გურია! „გურია! „გურია!“ და „გაუმარჯოს ქართულ ფეხბურთს!“, „გვჭირდება თუ არა საბჭოთა კავშირის ჩემპიონატი ფეხბურთში?!“ და „პირველი ეროვნული“, რომლებმაც განსაკუთრებული ადგილი დაიმკვიდრეს ქართული სპორტული კინოს ისტორიაში.

ბატონ ალაექსანდრეს ინიციატივით საფუძველი ჩაეყარა საქართველოს ეროვნულ ჩემპიონატს ფეხბურთში, შეიქმნა საქართველოს სპორტული კინოსა და ტელევიზიის დამოუკიდებელი ფედერაცია, რომელსაც, პრეზიდენტის რანგში, წლების მანძილზე ხელმძღვანელობდა.

ზვიად გამსახურდიას საპრეზიდენტო საარჩევნო კამპანიის ფარგლებში ბატონმა ალექსანდრე ჟღენტმა გადაიღო დოკუმენტური ფილმი „გაუმარჯოს პრეზიდენტს!“. როგორც საქართველოს უზენაესი საბჭოს დეპუტატი, სათავეში ჩაუდგა დამოუკიდებელი ქართული კინოს რეფორმას, მისი ხელმძღვანელობით შემუშავდა დემოკრატიულ საფუძველზე ქართული კინოს ორგანიზაციული მოწყობის კონცეფცია და დოკუმენტი და შეიქმნა „საქართველოს ეროვნული კინოკორპორაცია“.

ალექსანდრე ჟღენტის საცენარებით გადაღებულია მოკლერმეტრაჟიანი მხატვრული ფილმი „ფანჯარა“, დოკუმენტური ფილმები „მშვიდობით, კაპიტანო!“ და „ბაქანი“. მისი სცენარები „ძლევაჲ საკვირველი“, „მე ვარ სტადიონი“, „ვაზის ჭირიმე, ვაზისა!“, „ნიკე“, „გუნდა და ნაალა“, „მგელიკა ხუცარაული“, „დათვი მთვარიან ღამეში“ გამოქვეყნებულია სხვადასხვა პერიოდულ გამოცემებში.

საქართველოს კინოაკადემია უსამძიმრებს ბატონი ალექსანდრე ჟღენტის ოჯახს, მეგობრებს, ახლობლებს, კოლეგებს და მთელს საქართველოს”, – აღნიშნულია სამძიმრის ტექსტში.