ოკუპირებულ აფხაზეთში აცხადებენ, რომ საქართველოს ხელისუფლების ძალისხმევის შედეგად, ე.წ. „სავაჭრო-სამრეწველო პალატის“ მნიშვნელოვან საერთაშორისო გამოფენაში მონაწილეობა ჩაიშალა

ოკუპირებულ აფხაზეთში აცხადებენ, რომ საქართველოს ხელისუფლების ძალისხმევის შედეგად, ე.წ. „სავაჭრო-სამრეწველო პალატის“ მნიშვნელოვან საერთაშორისო გამოფენაში მონაწილეობა ჩაიშალა.

„1-ელ სექტემბერს, სტამბოლში სურსათისა და სასმელების საერთაშორისო გამოფენა „CNR Food Istanbul“-ი გაიხსნა. ალკოჰოლური სასმელებისა და ღვინის მცოდნეების მეორე სპეციალურ სექციაში აფხაზეთის რესპუბლიკის სავაჭრო-სამრეწველო პალატის მონაწილეობა იყო დაგეგმილი. „CNR Food Istanbul“-ი უნიკალური ბიზნეს-პლატფორმაა, რომელშიც ასზე მეტი ბრენდი მონაწილეობს. სამწუხაროდ, თურქეთში საქართველოს საელჩომ პროტესტი გამოთქვა აფხაზეთის რესპუბლიკის, როგორც დამოუკიდებელი სახელმწიფოს აღნიშნულ ღონისძიებაში მონაწილეობასთან დაკავშირებით და თურქეთის საგარეო საქმეთა სამინისტროს შესაბამისი ნოტით მიმართა. თურქეთის საგარეო უწყების ზეწოლის შედეგად, გამოფენის ორგანიზატორები იძულებულნი გახდნენ ბოლო მომენტში აფხაზეთი მონაწილე ქვეყნების სიიდან ამოეღოთ“, – ნათქვამია ოკუპირებული აფხაზეთის ე.წ. „სავაჭრო-სამრეწველო პალატის“ განცხადებაში.

დე ფაქტო უწყებაში ასევე აღნიშნავენ, რომ გასულ კვირას, ანალოგიური შემთხვევა მოხდა, როდესაც ე.წ. „სავაჭრო-სამრეწველო პალატას“ უარი ეთქვა „WorldFoodPoland“-ის გამოფენაში მონაწილეობაზე, რომელიც 2022 წლის აპრილში ვარშავაში გაიმართება.

„ამგვარი შემთხვევები ტრადიციად იქცა საქართველოსთვის. მსოფლიოს მასშტაბით საქართველოს საელჩოები სწრაფად რეაგირებენ აფხაზეთის სავაჭრო-სამრეწველო პალატის სხვადასხვა ღონისძიებაში მონაწილეობაზე და ამ პროცესს ხელს უშლიან. ეს სერიოზულ ზიანს აყენებს სავაჭრო-სამრეწველო პალატის საქმიანობას, რაც აფხაზეთის სავაჭრო-ეკონომიკური კავშირების განვითარებაზეა მიმართული“, – ნათქვამია განცხადებაში.

წყარო – იმედინიუსი