“გავწმინდე სისხლის კვალი, რომელიც იატაკზე და კედელზე იყო” – რას ჰყვება „კანიბალიზმის საქმედ“ წოდებული შემზარავი დანაშაულის მონაწილე

2016 წელს თბილისში მომხდარმა შემზარავმა მკვლელობამ და ამ დანაშაულის დეტალების გახმაურებამ მთელი საქართველო შეძრა. საქმე, რომელიც ე.წ. კანიბალიზმის საქმის სახელით არის ცნობილი, დღემდე შოკის მომგვრელია.დედის სადისტურად მკვლელობის ბრალდებით ირმა ყოჩიაშვილი, მისი მეგობარი ბექა შენგელია და კიდევ ერთი არასრულწლოვანი გოგონა დააკავეს.

მათი მსხვერპლი 76 წლის ლუბა ყოჩიაშვილი იყო. დედის მკვლელობაში ბრალდებული ირმა ყოჩიაშვილი ხუთი წელია, სასჯელს ქალთა სააღმსრულებლო დაწესებულებაში იხდის. მას 20 წლით თავისუფლების აღკვეთა აქვს მისჯილი.

ინტერვიუ, რომელიც ირმა ყოჩიაშვილი ციხიდან „კვირის პალიტრას“ მისცა. ის მომხდარზე, სრულიად განსხვავებულ ვერსიას ყვება და ამბობს, რომ აღიარებითი ჩვენება ძალით მიაცემინეს.

„საზოგადოება შეცდომაშია შეყვანილი. მე დაზარალებული ვარ. სამართალდამცველების მხრიდან ოჯახის წევრების სიცოცხლის მოსპობის მუქარით, წამებით, ზეწოლით, ტერორით, არაადამიანური მოპყრობით მიიღეს მაშინ ჩემგან ის ჩვენება…

მე დავიწყებ საუბარს დაკავების დღიდან. 2016 წლის 3 ნოემბერს ხელბორკილები დამადეს და მითხრეს, დაპატიმრებული ხარ ლუბა ყოჩიაშვილის მკვლელობის გამოო. როდესაც მანქანაში ჩამსვეს, ჩემზე ხორციელდებოდა სიტყვიერი შეურაცხყოფა და მუქარა, რადგან ბრალდებას უარვყოფდი.

გვითხარი, როგორ მოკალით, როგორ დაანაწევრეთ გვამი და როგორ გამოიყენეთ ორგანოები, თორემ ცუდად წავა შენი საქმე, მაინც მოგაყოლებენ ყველაფერსო. მიმიყვანეს პოლიციის მთავარ სამმართველოში. რამდენიმე თანამშრომელმა უფლება არ მომცა, რომ კანონით მონიჭებული დუმილის უფლებით მესარგებლა.

როდესაც ბრალს არ ვაღიარებდი, არაადამიანურად მექცეოდნენ და მაწამებდნენ. ხელითაც შემეხნენ, უმოწყალოდ მცემეს… მაგდა პაპიძემ არ აღიარა დანაშაული და შენც თუ არ აღიარებ, უვადოს მოგისჯიან, შენი შეყვარებული ბექა შენგელია ციხიდან კი არ გამოვა, გამოიტანენ, ჩაგათრევთ სარდაფში, რომელიც შენნაირებისთვის გვაქვს და საკუთარ თავს ვეღარ იცნობო.

სექსუალური ძალადობითაც მემუქრებოდნენ, გვითხარი, როგორ შეჭამეთ გულ-ღვიძლი, როგორ მოათავსეთ ქვაბში, როგორ მოაჭერით თავი, იმ ადგილასაც წაგვიყვან და გვანახებ ყველაფერს, იმასაც მოგვიყვები, სად მოისროლე მტკიცებულებებიო. არადა, შენგელია დაკავების დღიდანვე აღიარებდა, რომ მან მოკლა ლუბა ყოჩიაშვილი, მან დაანაწევრა გვამი და დაწვა.

მე მხოლოდ გავანადგურე ნივთები, რომ ანაბეჭდები არ დარჩენილიყო. შემდეგ დავალაგე სახლი, გავწმინდე სისხლის კვალი, რომელიც იატაკზე და კედელზე იყო. ამას ვაღიარებ, მაგრამ მე არ მომიკლავს, არ მომიკვეთავს მისთვის სხეულის არც ერთი ნაწილი. იმ ხერხსაც კი არ შევხებივარ, რითაც იყო დანაწევრებული, იმ დანასაც არ შევხებივარ, რომლითაც ლუბა ყოჩიაშვილი მოკლა ბექა შენგელიამ. ერთადერთი, რასაც ვაკეთებდი, სისხლის კვალს ვწმენდდი სახლში, რასაც მამაჩემის ჩვენებაც ადასტურებს. სახლში რომ მოვიდა, ყველაფერი დალაგებული დახვდა, იატაკიც მოწმენდილი იყო.

სასამართლოზე, როდესაც პროკურორი მეც მადანაშაულებდა, შენგელია მას სიტყვას აწყვეტინებდა და ამბობდა, რომ მხოლოდ მან მოკლა, მან დაანაწევრა და დაწვა ცხედარი. ბექას პროტესტზე მოსამართლის რეაქცია იყო – შენ თუ არ დაწყნარდები, დატოვებ პროცესსო. დღემდე ვერ ვხვდები, რატომ განმისაზღვრეს ამხელა სასჯელი“, – ამბობს „კვირის პალიტრასთან“ ინტერვიუში ირმა ყოჩიაშვილი.