თურქეთის ქალაქ ტრაპზონში ქართველი „კანონიერი ქურდების“ შეკრება გაიმართა. “პრაიმტაიმის” ინფორმაციით, შეკრებაზე კრიმინალური სტატუსი შეუჩერეს გიორგი ფოლადაშვილს, რომელსაც ქურდულ სამყაროში „სინკარას“ მეტსახელით იცნობენ.
შეკრება ასევე ქართველი „კანონიერი ქურდის“, ნოდარ გამისონიას ინიციატივით შედგა, რომელმაც თურქეთში მყოფ ქურდებს აცნობა, რომ ფოლადაშვილმა პარიზის სასამართლოში უარყო, რომ „კანონიერი ქურდის“ სტატუსს ფლობს, რაც კრიმინალურ წრეებში მიუღებელი განაცხადია.
აღსანიშნავია, რომ გიორგი ფოლადაშვილი და ნოდარ გამისონია 2017 წელს საფრანგეთში ჩატარებული სპეცოპერაციის შედეგად სხვა ქართველ „კანონიერ ქურდებთან“ ერთად დააპატიმრეს. საერთო ჯამში მაშინ 35-კაციანი დაჯგუფება აიყვანეს.
ფოლადაშვილიც და გამისონიაც “კანონიერ ქურდად” 2013 წელს თურქეთში “მონათლეს”. მათთან ერთად ასევე დააკავეს რემი დარახველიძე, რომელმაც “კანონიერი ქურდის” სტატუსი 2000 წელს, თბილისში მიიღო. სხვადასხვა დროს დაპატიმრებული იყო საქართველოში, უკრაინასა და სომხეთში.
კომენტარები