რაჭაში მომხდარი სისხლიანი გარჩევის საქმეზე, რა დროსაც 22 წლის ბიჭი დაჭრეს, 20 წლის ახალგაზრდა დააკავეს. გამოძიება მას ჯანმრთელობის განზრახ მძიმე დაზიანებას ედავება.
ინფორმაციას შინაგან საქმეთა სამინისტრო ავრცელებს. უწყების განცხადებაში ნათქვამია, რომ ბრალდებულმა 21 აგვისტოს, ამბროლაურში, კოსტავას ქუჩაზე, ურთიერთშელაპარაკების ნიადაგზე, 1999 წელს დაბადებული კ.ქ. ცივი იარაღის გამოყენებით დაჭრა და შემთხვევის ადგილიდან მიიმალა. დაჭრილი კაცი საავადმყოფოში გადაიყვანეს, სადაც შესაბამისი სამედიცინო დახმარება გაეწია.
განცხადებაში ასევე წერია, რომ მომხდარზე დანაშაულის შეუტყობინებლობის მუხლით კიდევ ორი პირი დააკავეს.
ჯანმრთელობის განზრახ მძიმე დაზიანებისა და დანაშაულის შეუტყობინებლობის ფაქტებზე გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით და 376-ე მუხლის 1-ლი ნაწილით მიმდინარეობს.
კომენტარები