ფოთში ქართული ოცნება 4-მა საჯარო მოხელემ დატოვა. ისინი ყოფილი პრემიერმინისტრის, გიორგი გახარიას გუნდს უერთდებიან.
ოთხივე პირი ფოთის მერიაში სხვადასხვა თანამდებობაზე მუშაობდა:
- გიორგი აფშილავა — ფოთის მერიის ყოფილი იურისტი;
- თამთა დაგარგულია — ფოთის მერიის მშენებლობის, ინფრასტრუქტურის, ტრანსპორტის, კეთილმოწყობის, ურბანული განვითარების, არქიტექტურისა და ადმინისტრაციული ზედამხედველობის სამსახურის ურბანული განყოფილების უფროსი;
- გიგლა თურქია — ფოთის ფოლკლორის ცენტრის დირექტორი;
- გოგი გაგუა — ფოთის სამხატვრო გალერეის დირექტორი
წასვლის მიზეზებსა და გიორგი გახარიას პარტიაში გადასვლის შესახებ ისინი სოციალურ ქსელში წერენ.
თამთა დაგარელია მიმართავს საჯარო სამსახურში დასაქმებულ ადამიანებს, რომ არ შეეშინდეთ, რადგან “ყველას ვერ გაათავისუფლებენ”.
“მინდა ვუთხრა თითოეულ საჯარო მოხელეს, არ შეგაშინოთ სამსახურის დაკარგვის მუქარამ, ყველას ვერ გაგათავისუფლებენ (ვიცი, ბევრი მიხვდება რასაც ვგულისხმობ)… დღეს ჩუმად ყოფნამ კი, ნამდვილად შეიძლება საფრთხე შეუქმნას არამხოლოდ თითოეულ ჩვენგანს, არამედ ქვეყნის მომავალს”, — წერს დაგარელია.
გიორგი აფშილავა თანამდებობის დატოვების მიზეზად ქვეყანაში შექმნილ ვითარებას ასახელებს.
“მიზეზი არის ის ვითარება, რომელიც შექმნილია ქვეყანაში — მუდმივი რადიკალიზმი, პოლარიზება, რაც დამღუპველია ჩვენი ქვეყნისთვის და რომლის გამოსწორების არც რესურსი და რაც კიდევ უფრო მნიშვნელოვანია, სურვილიც კი, აღარ აქვს მოქმედ ხელისუფლებას”, — წერს აფშილავა.
გიგლა თურქიას განცხადებით კი, ცვლილებების დროა და ამის გამო ტოვებს დაკავებულ თანამდებობას.
“ქალაქში არსებულმა ვითარებამ, დაუსრულებელმა დაპირისპირებამ და ქვეყნის ინტერესებზე მაღლა ვიწრო ინტერესების დაყენებამ მიმაღებინა გადაწყვეტილება დავტოვო ქალაქ ფოთის ფოლკლორის ცენტრის დირექტორის თანამდებობა და შევუერთე გიორგი გახარიას გუნდს”, — დაწერა გიგლა თურქიამ.
ფორმულასთან გააკეთა კომენტარი ფოთის სამხატვრო გალერეის ყოფილმა დირექტორმა. გოგი გაგუას თქმით, საჯარო სამსახურის დატოვება და გახარიას გუნდში გადასვლა, ყოფილი პრემიერის ავტორიტეტმა გადააწყვეტია.
“მიმაჩნია ბატონი გიორგი გახარია სახელმწიფოებრივად მოაზროვნე პიროვნებად. მიმაჩნია ძალიან დიდ პარტიოტად ჩვენი ქვეყნის. მას ჩვენი ქალაქისთვისაც ძალიან ბევრი აქვს გაკეთებული. გიორგი გახარიას ავტორიტეტმა გადაწყვიტა ჩემი მასთან ყოფნა”, — თქვა მან ფორმულასთან საუბრისას.
გიორგი გახარიამ პრემიერმინისტრის თანამდებობა 18 თებერვალს დატოვა. მან ეს გადაწყვეტილება ნიკა მელიას საქმეს დაუკავშირა და თქვა ისიც, რომ გუნდში ამაზე აზრთა სხვადასხვაობა იყო. 29 მაისს გახარიამ პარტიისა და გუნდის პრეზენტაცია გამართა. პარტიას საქართველოსთვის ჰქვია.
კომენტარები