კალიფორნიაში მასწავლებლებსა და სკოლის სხვა თანამშრომლებს ვაქცინაციის გავლა ან კორონავირუსზე ტესტის რეგულარულად ჩაბარება მოეთხოვებათ

ფოტო – როიტერსი

კალიფორნია აშშ-ის პირველი შტატი გახდა, სადაც მასწავლებლებსა და სკოლის სხვა თანამშრომლებს ვაქცინაციის გავლა ან კორონავირუსზე ტესტის რეგულარულად ჩაბარება მოეთხოვებათ. ამის შესახებ კალიფორნიის შტატის გუბერნატორმა, გევინ ნიუსომმა განაცხადა.

„ჩვენ ვფიქრობთ, რომ ეს მდგრადი გზაა ჩვენი სკოლების გახსნისთვის და იმ უმთავრესი შეშფოთების აღმოსაფხვრელად, რომელიც ჩემსავით მშობლებს აქვთ, როდესაც საქმე მცირეწლოვან ბავშვებს ეხებათ“, – აღნიშნა კალიფორნიის შტატის გუბერნატორმა.

კორონავირუსის „დელტა“ ვარიანტის გავრცელების ფონზე, აშშ-ში ბავშვებს შორის კორონავირუსით ინფიცირების მაჩვენებელი მკვეთრად გაიზარდა.

ზაფხულის დასაწყისში აღნიშნული მაჩვენებლის შემცირების შემდეგ, ბოლო კვირების განმავლობაში, ბავშვებში COVID-19-ის შემთხვევები კვლავ სტაბილურად იზრდება.

ამერიკის პედიატრიის აკადემიისა და ბავშვთა საავადმყოფოების ასოციაციის მონაცემებით, გასულ კვირას, ბავშვებს შორის კორონავირუსის 94 000 ახალი შემთხვევა გამოვლინდა.

მიუხედავად იმისა, რომ COVID-19-ით გამოწვეული მძიმე დაავადება ბავშვებში იშვიათია, ექსპერტები აცხადებენ, რომ გაზრდილი მაჩვენებელი შემაშფოთებელია.

„მიუხედავად იმისა, რომ კოვიდინფექციის მძიმე შედეგები ბავშვებს შორის შედარებით დაბალია, ჰოსპიტალიზაციის ამჟამინდელი ექსპონენციალური ზრდა ძალიან შემაშფოთებელი ტენდენციაა“,- განაცხადა ჯონ ბრაუნშტეინმა, ბოსტონის ბავშვთა საავადმყოფოს ეპიდემიოლოგმა.

აღსანიშნავია, რომ აშშ-ის სურსათისა და წამლის ადმინისტრაციას ჯერ არ დაუმტკიცებია ვაქცინების 12 წლამდე ასაკის ბავშვებში გამოყენება.

წყარო – იმედინიუსი