„ბიძინა ივანიშვილს ხაფანგში თავი შეაყოფინეს“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.

– გიორგი გახარიამ ჟურნალისტების შეკითხვას, რამდენად სავარაუდოა, რომ „ქართული ოცნება“ 19 აპრილის შეთანხმების ანულირების გადაწყვეტილება ბიძინა ივანიშვილთან კონსულტაციების გარეშე მიიღებდა, ასე უპასუხა – „ამ ხალხს გამბედაობის სერიოზული პრობლემა აქვს, ამ ხალხს საკუთარი აზრის გამოთქმის პრობლემა აქვს“. ცოტა არ იყოს, გამიკვირდა ეს გახარიასგან, თქვენ რას იტყვით?

– ასეთ დამანგრეველს და კატასტროფულს, ცხადია, ვერ იტყოდა კობახიძე  ბიძინა ივანიშვილის გარეშე.  ვინ ვინ  და გიორგი გახარიამ ეს ძალიან კარგად იცის. ამასთან, კობახიძე როდესაც შარლ მიშელის შეთანხმების ანულირებაზე ლაპარაკობდა, პრემიერი ირაკლი ღარიბაშვილი გვერდით ედგა. ღარიბაშვილი, თუ შეიძლება ასე ითქვას,  უფრო მეტად ითვლება ივანიშვილის კადრად, ვიდრე კობახიძე. ღარიბაშვილს სხვაზე მეტად ენდობა და პრემიერი უსიტყვოდ ერთგულია ივანიშვილისა. ამიტომაც არის, ირაკლი ღარიბაშვილს რომ  აკისრებენ პასუხისმგებლობას ევროპელი პარტნიორები და მის გადადგომას მოითხოვენ.  ბიძინა ივანიშვილსაც, ეტყობა, ვიღაცები აგულიანებენ და აიმედებენ, რომ ევროპასთან დაულაგებენ ურთიერთობებს. ვფიქრობ, ამ საქმეში პრეზიდენტ სალომე ზურაბიშვილის იმედი აქვს.  ცხადია, რუსეთიც აგულიანებს, რადგან რაც უფრო შორს ვიქნებით ევროპისგან,  უფრო მეტი შანსი იქნება, რუსეთისკენ გადავიხაროთ.  თუმცა, ბიძინა ივანიშვილს ხაფანგში თავი შეაყოფინეს, ეს ცხადზე ცხადია.  როგორც არ უნდა შეეცადოს ამ არეული ვითარების დალაგებას, პირველ რიგში, ბიძინა ივანიშვილს ამ „გადაგდებას“ არ აპატიებს არც  ევროპა და უპირველესად, ამერიკა, რომელიც მთელ მსოფლიოში დემოკრატიის მთავარი დამცველია.

– ფაქტია, ძალიან ვშორდებით ევროპას და ამერიკას და  რამდენად რეალურია, რომ მალე რუსეთის გავლენის ქვეშ აღმოვჩნდეთ? მთლად „ევრაზიული კავშირის“ წევრობას არ ვგულისხმობ, მაგრამ ჩვენში ხელისუფლების ცვლილებები, საქართველოს საგარეო კურსის განსაზღვრა  რუსეთის ნებაზე რომ გახდეს დამოკიდებული, ამას ვგულისხმობ. – სიმართლე გითხრა, მაგ საშიშროებას დღეს ვერ ვხედავ. რუსეთში შემოდგომით საპარლამენტო არჩევნებია და მმართველ პარტიას საკმაოდ დაბალი რეიტინგი აქვს. საკუთარი პრობლემები აქვს რუსეთს. ჩვენნაირი პატარა ქვეყნები, ვერასდროს ვერ ცვლიან საერთაშორისო პოლიტიკურ კლიმატს. საქართველოს ხელისუფლებამ შეურაცხყოფა მიაყენა ევროკავშირს და ამას არ აპატიებენ, დასჯიან. მოკლევადიან პერსპექტივაში კი, ხელისუფლების წარმომადგენლებს ამ სასჯელისგან, ვერც რუსეთი იხსნის და ვერც ვერავინ. მსოფლიო პოლიტიკაში უკვე დოგმაა და მას არავინ არღვევს – სუსტს ძლიერის შეურაცხყოფის უფლება არ აქვს და თუ შეურაცხყო, აუცილებლად დაისჯება. მოგვწონს თუ არა, ეს დიდი ხნის წინ  დადგენილი წესებია და მსოფლიო სახელმწიფოები ამ წესებით თამაშობენ. თუ მსოფლიოს ნაწილი ხარ, ეს წესები უნდა დაიცვა.  მით უმეტეს, სუსტის გადასაწყვეტი არ არის, ვინ იქნება მისი მფარველი. ეს ძლიერებმა უნდა გადაწყვიტონ ერთმანეთში. როგორ წარმოგიდგენია ახლა, რამდენი მილიარდი ჩადეს საქართველოში ევროპამ და ამერიკამ და ეს უზარმაზარი თანხა ერთ დღეში ჩამოწერონ, ჩვენს ნებაზე მიგვიშვან და ეს სხვას მაგალითად ჰქონდეს, რომ შეგიძლია, მოწველო დიდი სახელმწიფოები და მერე „გადააგდო“, ზურგი შეაქციო და ისეთი სახელმწიფო გაიხადო პარტნიორად, რომელსაც ევროპა და ამერიკა ოფიციალურად საფრთხედ აღიქვამენ და რეალურად –მტრად. ცხადია, ამ შემთხვევაში, რუსეთს ვგულისხმობ.