“ეს არის წინასაარჩევნო კამპანია და არჩევნების გაყალბება, რომელიც დღესვე მიმდინარეობს”, – ამის შესახებ “მთავარი არხის” გენერალურმა დირექტორმა, ნიკა გვარამიამ “ღამის მთავარში” საუბრისას განაცხადა.
გვარამიამ გადაცემაში არხის სარეკლამო სახლში საგადასახადო სამსახურის შესვლასა და ჟურნალისტების მიმართ გამოცხადებულ რეპრესიებზე ისაუბრა. ამასთან, გვარამიამ აღნიშნული გადაცემის საშუალებით ირაკლი კობახიძის განცხადება გამოეხამაურა, რომლის თანახმად, თითქოს კრიტიკულ ტელევიზიებში შავი ფული ტრიალებს და დასძინა, რომ – “ეს არის სრული სისულელე.”
“შემოსავალი იმდენია “რუსთავი 2-ის” რამდენიც ჩვენი და გასავალი არის 2-ჯერ მეტი, ვიდრე ჩვენი. ტელეკომპანია “იმედს” იმიტომ, რომ მთელი სახელისუფლებო მანქანა მასზე მუშაობს, შემოსავალი აქვს ჩვენზე დაახლოებით 3-ჯერ მეტი, მაგრამ გასავალი აქვს 6-ჯერ მეტი და ხო არ ჰკითხავდა [კობახიძე] მათ შორის ამ ტელევიზიების წარმომადგენლებს, რამდენი და რომელი შავი ფული ტრიალებს იქ. ინვესტორი რამდენ ფულს ჩადებს და როგორ ჩვენ როგორ უნდა ვაკონტროლოთ? მაშინ მას უნდა დაუდგინონ, რომ ეს არის შავი ფული, ტელევიზიასთან ამას რა კავშირი აქვს? ჩვენ როგორ შეიძლება ვაკონტროლოთ წყაროს წყარო. სრული სისულელეა, ჩვენთან შემოსვლით, როგორ უნდა გაირკვეს შავი ფულია, თეთრი თუ მწვანე”, – განაცხადა ნიკა გვარამიამ.
ცნობისთვის, 15 ივლისს “ქართული ოცნების” თავმჯდომარემ, ირაკლი კობახიძემ განაცხადა, რომ კრიტიკულ ტელევიზიებში “შავი ფული ტრიალებს” და ამაზე გამოძიება უნდა ჩატარდეს.
ამასთან, შეგახსენებთ, დღეს, საგადასახადო ინსპექცია “მთავარი არხის” გაყიდვების სახლში შევიდა. აღნიშნულთან დაკავშირებით არხის გენერალუმა დირექტორმა განაცხადა, რომ – “ეტყობა ტელევიზიაში ვერ გაბედეს, მაგრამ გაყიდვების სახლში შესვლა იდენტურია ტელევიზიაში შემოსვლის, ვინც ჩვენს რეკლამებს ყიდის, აი, იმ სახლში შევიდნენ.”
მოგვიანებით, ფინანსთა სამინისტროს შემოსავლების სამსახურმა განცხადება გაავრცელა, რომლითაც “მთავარი არხის” გენერალური დირექტორის, ნიკა გვარამიას განცხადებას გამოეხმაურა.
როგორც მათ მიერ გავრცელებულ განცხადებაში ვკითხულობთ, შემოსავლების სამსახურში მუდმივად ხორციელდება გადამხდელთა გეგმური საგადასახადო შემოწმება, რომელიც ეფუძნება საგადასახადო კონტროლის ღონისძიებებისთვის გადამხდელთა შერჩევას, ავტომატიზებული ელექტრონული სისტემის მეშვეობით.
ამასთან, როგორც განცხადებაშია ნათქვამი, აღნიშნული მიდგომით, მიმდინარე წლის ივლისის თვეში შერჩეულ იქნა დამატებით 500-მდე გადამხდელი, მათ შორის ტელეკომპანია “მთავარი არხი“-ს მიერ გაჟღერებული სარეკლამო სააგენტო, რომელიც სხვა მეწარმე სუბიექტებთან ერთად მომსახურებას უწევს ამ ტელეკომპანიას. მათივე ინფორმაციით, შესაბამისად, გაცხადებული საგადასახადო კონტროლის ღონისძიება არ ეხება უშუალოდ სამაუწყებლო კომპანიას.
კომენტარები