“ახალმა დადგენილებამ “გზა გაუხსნა” შარლატანებს და ფალსიფიკატორებს” – გიორგი კავკასიძე

 მედიცინის დოქტორი, სამედიცინო ცენტრის „ლაბუნი“ ხელმძღვანელი, გიორგი კავკასიძე

“2021 წლის 15 ივლისი №359 განკარგულება არის ცვლილება „იზოლაციისა და კარანტინის წესების შესახებ“ საქართველოს მთავრობის 2020 წლის 23 მაისის დაგენილებაში. ძალიან მაინტერესებს, როგორ მოხდება მიღებული განკრგულების აღსრულება როდესაც:

1. ქვეყანაში არ არსებობს PCR ტესტირების შედეგის (სერტიფიკატის) ერთიანი სტანდარტი.

2. ქვეყანაში არ არსებობს PCR-ტესტირების შედგეგის/სერტიფიკატის ფალსიფიკაციის საწინააღმდეგო მექანიზმი ;

ამ განკარგულების გამოქვეყნებისთანავე გამოჩნდნენ დაწესებულებები, რომლებიც მსურველებს სთავაზობენ PCR-ტესტირებას 35-45 ლარად.

ვინც ჩახედულია კოვიდ-19 მოლეკულური კვლევის (PCR) მეთოდიკაში, დამეთანხმება რომ ეს ფასი ხარისხიანი რეაგენტების და ერთჯერადი გამოყენების ლაბორატორიული ინსტრუმენტების თვითღირებულებაზე დაბალია, არაფერს ვამბობ ტესტირებასთან დაკავშირებულ არაპირდაპირ ხარჯებზე – ხელფასი, არენდა, ელ-ენერგია, წყალი და ა.შ.

ფაქტობრივად ახალმა დადგენილებამ “გზა გაუხსნა” შარლატანებს და ფალსიფიკატორებს.

ამას გარდა, ჩვენი ქვეყნის რეგულაციით საჰაერო გზით შემოსულ სრულად აცრილ ვიზიტორს/სტუმარს საზღვრის გადაკვეთისას არ ვთხოვთ PCR-კვლევის სერტიფიკატს, რაც ზრდის უსიმპტომო გადამტენების მიერ ახალი შტამების შემოტანის რისკს “აუცრელ ქვეყანაში”.

მდგომარეობის გამოსასწორებლად სასწრაფოდ მისაღებია

1. PCR-ტესტის შედეგის (სერტიფიკატის) ნაციონალური ფორმა/სტანდარტი;

2. რეგულაცია რომ ყველა ვიზიტორს (აცრილსაც და აუცრელსაც) მოეთხოვოს ბოლო 72 საათში ჩატარებული PCR კვლევის რეზულტატი;

3.ვალდებულება რომ ყველა სერტიფიკატს (როგორც საქართველოში ასევე საზღვარგარეთ გაცემულს)ჰქონდეს უნიკალური QR კოდი, რომლის შემოწმება სმარტფონით არის შესაძებელი და არ საჭიროებს დამატებით ხელსაწყოებს.”

ცვლილებების თანახმად, ტრენინგებზე, კონფერენციებსა თუ სემინარებზე მონაწილეთა დასწრება დასაშვებია მხოლოდ წინასწარი PCR-ტესტირების საფუძველზე.

ამასთან, მთავრობის №322 დადგენილებით, იკრძალება ბანაკის ტიპის შეკრებები, მათი ორგანიზაციული ფორმისა და ჩატარების ადგილის მიუხედავად.

ხოლო 18 წლამდე ასაკის მოზარდების სპორტული ტურნირებისა და სასწავლო-საწვრთნელი შეკრებების ჩატარება დასაშვებია მხოლოდ ყველა მონაწილის წინასწარი PCR-ტესტირების საფუძველზე.

დადგენილებას ხელს აწერს პრემიერ-მინისტრი ირაკლი ღარიბაშვილი და ცვლილებები 19 ივლისიდან ამოქმედდება.

საქართველოს მთავრობის დადგენილება „იზოლაციისა და კარანტინის წესების დამტკიცების შესახებ“ საქართველოს მთავრობის 2020 წლის 23 მაისის №322 დადგენილებაში ცვლილების შეტანის თაობაზე საკანონმდებლო მაცნეში გუშინ, 15 ივლისს გამოქვეყნდა.