“სად არის ჩემი ფული?! – ხელოვან ხალხს გაფრთხილება გვჭირდება” – მოთხოვნა პარლამენტის კულტურის კომიტეტს

საავტორო უფლებების დაცვის მოთხოვნით, 400-მდე ხელოვანი პარლამენტის კულტურის კომიტეტს მიმართავს. ბრიფინგზე მათ თქვეს:

“კონკრეტული კანონები, რომელიც დღეს არსებობს, იმდენად ბუნდოვანია, რომ ფაქტობრივად არარსებულია. ჩვენი თხოვნაა, რომ ეს კანონები, რაც საავტორო უფლებებს და საავტორო უფლებებით ანაზღაურებას ეხება, გახდეს კონკრეტული, გამჭვირვალე და ავიდეს საკანონმდებლო დონეზე,” – აღნიშნა მომღერალმა ზუკა ხუციშვილმა.

მომღერალი რომა რცხილაძე ამბობს, რომ კულტურის სფეროს სათანადო მხარდაჭერა, ხელოვან ხალხს კი გაფრთხილება სჭირდება.

“სად არის ჩემი ფული?! – ჩვენ ხელოვან ხალხს გაფრთხილება გვჭირდება. კულტურას, თუ არ მივხედეთ, ვერანაირი პოლიტიკა, მედიცინა, სპორტი და განათლება ვერ მიაღწევს იმ სიმაღლეებს, რაც ჩვენ გვეკადრება,” – განაცხადა მომღერალმა რომა რცხილაძემ.