ჟურნალისტი, პირველი არხის სამეურვეო საბჭოს წევრი, ბონდო მძინარაშვილი, აქვეყნებს ვიდეოს და წერს:
“მოდი, დავიწყოთ შეთანხმებით!
შევთანხმდეთ, რომ
გიორგი გახარიას გადატრიალება არ უნდოდა!
გამოტრიალება უნდოდა!
და გამოტრიალდა!
ან, – შემოტრიალდა!
აბა, კაცი პრემიერ-მინისტრი, სახელმწიფოს აღმასრულებელი ხელისუფლების პირველი პირი იყო და, – ვინ უნდა გადაეტრიალებინა?!
პარტიულ გადატრიალებას აპირებდა?!
მეორე საკითხია, სინამდვილეში რა მოხდა:
გიორგი გახარიას ძალიან აღიზიანებდა ის, რომ მმართველი პარტიის ელიტა მას ორგანულ ნაწილად არ აღიქვამდა და მხოლოდ მიღებული გადაწყვეტილების აღმსრულებლად განიხილავდა.
ამ თვალსაზრისით გახარია მარტო არ ყოფილა, – გავიხსენოთ კახა კახიშვილის უკმაყოფილების მიზეზი.
ბიძინა ივანიშვილის პოლიტიკიდან წასვლის შემდეგ “ქართულ ოცნებაში” საკანონმდებლო და აღმასრულებელი ხელისუფლების რამდენიმე წარმომადგენელმა შექმნა მცირერიცხოვანი ჯგუფი, რომელიც ყველა მნიშვნელოვან გადაწყვეტილებას იღებს და სხვა დანარჩენი, – მინისტრებიც და დეპუტატებიც, – ვალდებული არიან, უსიტყვოდ დაემორჩილონ!
ამ გადაწყვეტილების მიმღებებს შორის არ იყო გახარია!
არადა, უფლებებით აღჭურვილ და ვალდებულებებით დატვირთულ პრემიერ-მინისტრს გაცილებით მეტის ამბიცია ჰქონდა. მით უმეტეს, რომ მმართველი პარტიის ელიტაში არავის (ვიმეორებ, – არავის!) განიხილავდა არც თავისზე ჭკვიანად, არც თავისზე გონიერად და არც თავისზე სახელმწიფოებრივად მოაზროვნედ!
ამ ვითარებაში ჯერ შსს მინისტრმა და შემდგომ უკვე პრემიერ-მინისტრმა გახარიამ გაინსტრუმენტების საფრთხე დაინახა და პრემიერის თანამდებობაზე უკვე საკუთარი ერთგული კადრების განთესვა დაიწყო. მათ შორის, “ქართული ოცნების” პროპორციულ სიაში. ის ცდილობდა, საკუთარი გუნდი შეექმნა და ზურგი იმდენად გაემაგრებინა, რომ ანგარიშგასაწევი გამხდარიყო!
გახარიას არავისთვის და, მით უმეტეს, სახელმწიფოსთვის არ უღალატია, – მან საკუთარი თამაში წამოიწყო!
ეს იცოდნენ და ხელსაც არ უშლიდნენ მანამ, სანამ გახარია ლოიალური იყო და საკუთარი უფლებამოსილების ფარგლებში მოქმედებდა!
გახარიამაც კარგად იცოდა, რომ ყველა ჩრდილში დარჩებოდა და მელიას დაკავების დროს ერთი ადამიანიც რომ დაღუპულიყო, მისი კარიერა სამუდამოდ დასრულდებოდა, – მთელ პასუხისმგებლობას მას აჰკიდებდნენ, როგორც აღმასრულებელი ხელისუფლების მეთაურს!
ამიტომაც მოითხოვა, რომ პროცესები მისი გეგმით წარმართულიყო: მას არ უნდოდა წაგების ზიანი ეზღო ისე, რომ მოგებისგან არაფერი დარჩენოდა!
სინამდვილეში ყველაფერი გაცილებით მარტივია!
ხელისუფლების შიგნით ძალაუფლების გადანაწილებაზე ვერ შეთანხმდნენ და გახარიამ, ვიდრე მას მოიშორებდნენ, დაასწრო და გადადგა!
სწორედ ეს დასწრება, ეს გადადგომა ვერ აპატიეს, თორემ გახარია არასოდეს ყოფილა “ქართული ოცნების” ორგანული ნაწილი, რომ მისთვის ეღალატა; ის მხოლოდ ხელისუფლების ნაწილი იყო, ოღონდ, ივანიშვილის ხელისუფლების ნაწილი!
ახლა კი, როცა საკუთარი თამაში ღიად წამოიწყო, გამოჩნდება, რამდენად სერიოზული მოთამაშეა, – თუკი აქამდე ფრთხილად დადიოდა პოლიტიკის თხელ ყინულზე, ახლა მისგან მტკიცე ნაბიჯებს ელოდებიან!
ჩვენც დაველოდოთ!”
კომენტარები