26 მაისს დამოუკიდებლობის დღისადმი მიძღვნილ გალა-კონცერტზე პრემიერმინისტრ, ირაკლი ღარიბაშვილს დაახლოებით 36 000 ლარიანი, მის ცოლს, ნანუკა თამაზაშვილს კი დაახლოებით 18 000 ლარიანი საათები ეკეთათ. კანონის მოთხოვნის მიუხედავად, ეს ნივთები პრემიერს ქონებრივ დეკლარაციაში შეტანილი არ აქვს. ამის შესახებ ინფორმაციას “რადიო თავისუფლება” ავრცელებს.
ფოტო მასალა Facebook-ზე საქართველოს მთავრობამ გამოაქვეყნა. ფოტოებზე ორივე მათგანის მაჯის საათები მკაფიოდ ჩანს.
“რადიო თავისუფლების” ინფორმაციით, პრემიერმინისტრს უკეთია IWC-ს ბრენდის საათი, მოდელი პორტოფინო (PORTOFINO AUTOMATIC). საქართველოში ამ ბრენდს იცნობენ როგორც შაფჰაუზენს და მისი საბაზრო ღირებულება დღეს, დაახლოებით, 36 ათასი ლარია. საათი მექანიკურია, ავტომატური მომართვით, დამზადებულია 18-კარატიანი ვარდისფერი ოქროსგან, აქვს ალიგატორის ტყავის სამაჯური. ამ მოდელის მთავარი ღირსება საათის უკანა მხარეს ოქროზე გრავირებული ქალაქ პორტოფინოს ნავსადგურია. პრემიერ ღარიბაშვილს ქონებრივ დეკლარაციებში ამ ორი მაჯის საათიდან არც ერთი არა აქვს მითითებული.
რატომ მალავს პრემიერი საათებს დეკლარაციაში უცნობია. “რადიო თავისუფლება” ამბობს, რომ კითხვებით მთავრობის ადმინისტრაციას 28 მაისს მიმართეს, პასუხი არც წერილზე არც ზარებსა და მოკლე ტექსტურ შეტყობინებებზე არ მიუღიათ.
კომენტარები