ჟურნალისტი, თამო კეშელავა:
ჟურნალისტებთან “საჩხუბრად” ბავშვები “გამოუშვეს” ნინოწმინდის პანსიონიდან, აღმზრდელები არ არიან აქ და არ უნდათ თქვენთან საუბარიო, ბავშვმა თქვა.
ყველაზე მნიშვნელოვანი ისაა, რომ ამ ბავშვმა ჟურნალისტებთან “ჩხუბის” დროს თქვა – “ბავშვები კარგად ვიქცევით…”
საერთოდ არაფერთან იყო კავშირში.
არ უკითხავს არავის.
არ დაუდანაშაულებია არავის.
თქვა ის ფრაზა, რისი თქმაც ხშირად უწევს, ალბათ, თქვა ის ფრაზა, რაზეც მისი ამჟამინდელი ცხოვრებაა აწყობილი, ალბათ, კარგად უნდა მოიქცეს, თორემ…
ამიტომაა, ფსიქოლოგების ჩართვა აუცილებელია, როგორც უნდა დაარიგონ ბავშვი, იგი აუცილებლად გეტყვის, დაგანახებს სიმართლეს…
ასევე, ჩემი ყურადღება მიიქცია ფრაზამ და ინტონაციამ, საუბრის სტილის ცვლილებამ, მოკლე პასუხმა, მაშინ როცა მთავარი მიზეზი სწორედ სავარაუდო ძალადობაა – “ეგ ტყუილია, კაცო” და ხმადაბალმა – არა-მ, როცა განმეორებით ჰკითხეს, ხომ არ ძალადობენ მასზე.
მასალა მცირეა, მაგრამ ხელთ გვაქვს რამდენიმე ბავშვის ხმა და ყოფილი აღსაზრდელის ინტერვიუ, მეუფის ინტერვიუ, გვაქვს გამოწყობილი ბავშვების სიმღერისა და ცეკვის ვიდეოები – ფსიქოლოგებს ამ მასალებიდან, იმის თქმა მაინც შეუძლიათ, რა ნიშნებს ხედავენ საწყის ეტაპზე.
უნდა დაიწყონ ფსიქოლოგებმა პროფესიით მუშაობა, დროა.
პ.ს. ჩემი შვილი პატარაობისას, ხშირად მეუბნებოდა, რომ არასოდეს მიმატოვებს. მე ბევრს ვმუშაობდი და ხშირად არ ვიყავი სახლში, როგორც ჩანს, ამიტომაც გაუჩნდა მიტოვების შიში და ამიტომაც მეუბნებოდა ფრაზას, რომელიც ჩემგან უნდოდა მოესმინა და მეც იმდენჯერ და მანამ ვუთხარი, რომ არასოდეს მივატოვებდი, სანამ რომ შეწყვიტა ამის თქმა. როცა ამ ფრაზის თქმა შეწყვიტა, მაშინ დამთავრდა მისი შიში.
ნინოწმინდის ბავშვთა სახლში მყოფ ბავშვებს მინდა ვუთხრა, თქვენ არაფერში ხართ დამნაშავე, თქვენ კარგი ბავშვები ხართ, ყველა ბავშვი კარგია და მხოლოდ ჩვენზე, უფროსებზეა დამოკიდებული, როგორი ბავშვობა გექნებათ, რას ისწავლით და როგორ.
თქვენ არაფერი დაგიშავებით, თქვენ კარგი ბავშვები ხართ! თქვენ დიდი სიყვარულისთვის და ფერადი ბავშვობისთვის ხართ გაჩენილები და ყველაფერს გავაკეთებთ, რომ ისეთი ბავშვობა გქონდეთ, როგორსაც იმსახურებთ.
კომენტარები