ნასვამი, ან ნარკოტიკული ნივთიერებით სიმთვრალე საჭესთან – გაზრდილი ჯარიმები და პატიმრობა – დეტალები

პარლამენტში შეტანილია კანონპროექტი, რომლის მიხედვითაც მკაცრდება მძღოლის პასუხისმგებლობა, თუ ის საჭესთან ნასვამი ზის.

ახალი კანონმდებლობით, თუ მძღოლი სატრანსპორტო საშუალებას ალკოჰოლური სიმთვრალის მდგომარეობაში მართავს, ან თავს არიდებს შემოწმებას სიმთვრალეზე, მას მართვის უფლება არა 6 თვით, არამედ უკვე 1 წლით შეუჩერდება.

თუ იგივე დარღვევა გამეორდა მაშინ, როდესაც პირს მართვის უფლება შეჩერებული აქვს, ამ შემთხვევაში დღეის მდგომარეობით, ერთი წლით მართვის უფლების შეჩერება და 700-ლარიანი ჯარიმაა დაწესებული, ახალი კანონპროექტით, ერთწლიანი ვადა ძალაში რჩება, 700-ლარიანი ჯარიმა კი 2000 ლარამდე იზრდება, ასევე ამას ემატება 5-დან 15 დღემდე ადმინისტრაციული პატიმრობა.

მოპედის მართვა ალკოჰოლური სიმთვრალის მდგომარეობაში, ან სიმთვრალის დასადგენად შემოწმებისთვის თავის არიდება, გამოიწვევს მძღოლის დაჯარიმებას 300 ლარის ოდენობით, ნაცვლად 150 ლარისა. მოპედის მართვა ნარკოტიკული ან ფსიქოტროპული სიმთვრალის მდგომარეობაში, ან ამ სიმთვრალის დასადგენად შემოწმებისათვის თავის არიდება, გამოიწვევს მძღოლის დაჯარიმებას 600 ლარით, ნაცვლად 300 ლარისა.

სატრანსპორტო საშუალების სამართავად გადაცემა მისთვის, ვინც ნარკოტიკული ან ფსიქოტროპული სიმთვრალის მდგომარეობაშია, გამოიწვევს დაჯარიმებას 2000 ლარის ოდენობით, ნაცვლად 1000 ლარისა.

კანონპროექტი პარლამენტში პარტია „მოქალაქეების“ ლიდერებმა ალეკო ელისაშვილმა და ლევან იოსელიანმა შეიტანეს.