კანადა გმობს რუსეთის მხრიდან საქართველოს წინააღმდეგ კიბერშეტევას

კანადის საგარეო უწყება გმობს რუსეთის ფედერაციის მხრიდან საქართველოს წინააღმდეგ განხორციელებულ კიბერშეტევას. 

„კანადა გმობს რუსეთის მავნებლურ კიბერ-მოქმედებას საქართველოს წინააღმდეგ“ – წერს კანადის საგარეო უწყება საკუთარ „ტვიტერზე“.

შეგახსენებთ, რომ საქართველოში მასშტაბური კიბერშეტევა 2019 წლის 28 ოქტომბერს განხორციელდა. პრობლემები შეექმნა ასობით ვებგვერდს. ასევე, გაითიშა რამდენიმე ტელევიზია და სხვადასხვა ვებპორტალი.

კიბერშეტევა განხორციელდა საქართველოს პრეზიდენტის ადმინისტრაციის ვებგვერდზეც. ვებგვერდების გახსნისას ექსპრეზიდენტ მიხეილ სააკაშვილის ფოტო გაჩნდა, წარწერით – „მე დავბრუნდები“ (I’ll be back).

20 თებერვალს, საქართველოს საგარეო საქმეთა სამინისტროში განაცხადეს, რომ 2019 წლის ოქტომბერში საქართველოში კიბერშეტევა რუსეთის შეიარაღებული ძალების გენშტაბმა განახორციელა.