“9-10 წლის ბავშვები ვენებს რომ “აჯიბრებენ”, ვინ უკეთ იკეთებს ნარკოტიკს, იცით,  ხელისუფლებავ?” – რეხვიაშვილი

ჟურნალისტი, ნაზიბროლა რეხვიაშვილი:

“ამ მშვიდობითა და მოთუხთუხე ეკონომიკით განთქმულ ქვეყანაში ამდენი არასრულწლოვანი რომ იქცა დამნაშავედ, ყოველ ღამით რომ კომერციულ ობიექტებს ძარცვავენ, ქურდობენ, სისხლიან გარჩევებს აწყობენ, არის ვინმე პატრონი?

ბავშვები, 9-10 წლის და წარმოიდგინეთ, უმცროსებიც რომ ეზოებში ნარკოტიკებზე საუბრობენ, ერთმანეთს უკვე გამოცდილებას უზიარებენ და ვენებს “აჯიბრებენ”, ვის უკეთესად შეუძლია ნარკოტიკის გაკეთება, იცით ამის შესახებ რამე @საქართველოს ხელისუფლებავ (ვერ მოგნიშნეთ რატომღაც)?

სკოლებში რომ არასრულწლოვნების საკმაოდ დიდი ნაწილი საკუთარ კრიმინალურ ან ნარკოტიკულ საშუალებებთან ურთიერთობის გამოცდილებას აცნობს თანატოლებს და ამით ამაყობს, ამის შესახებ გსმენიათ რამე, განათლებისა და მეცნიერების სამინისტრო?

ჩემი და ჩემსავით არაგულგრილი ადამიანების ფრაგმენტული ჩარევა არ ყოფნის ამას, სისტემური ამბავია და ამდენ “ამბიციურ გეგმაში” ვერაფრით მოხვდა ხო ეგ პრობლემა? თუ საერთოდაც ეგ რა პრობლემაა?

კაი, ათუხთუხეთ ეკონომიკა და იძახეთ, რომ ქვეყანაში ომი არაა. ამ არასრულწლოვნებს რომ კარგავთ ასობითა და ათასობით, მაგას ნუ შეიმჩნევთ, მთავარია, თქვენ იყოთ მარადიული სხივით ნათელდამდგარი და ქებული.”