სუს-ი თამარ ბაჩალიაშვილის საქმეზე განცხადებას ავრცელებს. საქმე ეხება ინფორმაციას, რომლის თანახმად, ბაჩალიაშვილს მათი უწყების კუთვნილი ავტომობილები დაყვებოდნენ და უთვალთვალებდნენ.
რამდენიმე დღის წინ პროკურატურამ განცხადება გააკეთა და თქვა, რომ აღნიშნული მანქანები, მართლაც სუს-ისაა და მართლაც დაფიქსირდნენ ვიდეოთვალის ჩანაწერებში, მაგრამ ისინი შემთხვევით აღმოჩნდნენ თამარის მანქანის უკან – “ავტომანქანები რუსთავის გზატკეცილზე, თამარ ბაჩალიაშვილის ავტომანქანის უკან, მხოლოდ გარკვეულ მონაკვეთზე აღმოჩნდნენ, ამის შემდეგ კი თბილისი-მარნეულის გზატკეცილიდან გადაუხვიეს და შავნაბადას საწვრთნელ ბაზაზე შევიდნენ.”
სუს-ის განცხადებას აუცვლელად გთავაზობთ:
“მაღალი საზოგადოებრივი ინტერესიდან გამომდინარე, გვსურს გამოვეხმაუროთ მასმედიაში გავრცელებულ მცდარ ინფორმაციას, სახელმწიფო უსაფრთხოების სამსახურის კუთვნილი ავტომობილების მეშვეობით, გარდაცვლილი თ. ბაჩალიაშვილის მიმართ შესაძლო თვალთვალის განხორციელებასთან დაკავშირებით.
პირველ რიგში, სამსახურის სახელით გვსურს თანავუგრძნოთ გარდაცვლილის ოჯახს და ახლობლებს და სრული პასუხისმგებლობით განვაცხადოთ, რომ აღნიშნულ ტრაგიკულ შემთხვევასთან, სახელმწიფო უსაფრთხოების სამსახურს არანაირი შემხებლობა არ გააჩნია.
მიზანმიმართულად გავრცელებულ ყველა არასწორ ვერსიას გააჩნია აღნიშნული სამსახურის და მისი ღირსეული თანამშრომლების დისკრედიტაციის და საზოგადოების შეცდომაში შეყვანის მიზანი. აღნიშნული ცრუ ვერსიების გავრცელების უკან კი დგანან პოლიტიკურად ანგაჟირებულ პირთა ჯგუფები და კონკრეტული მედია საშუალებები.
სახელმწიფო უსაფრთხოების სამსახურის ავტომობილების გადაადგილება აღნიშნულ მარშრუტზე ხორციელდება ყოველდღიურად, რაც უკავშირდება თანამშრომლების მიერ დაკისრებული მოვალეობების კეთილსინდისიერად და ღირსეულად შესრულებას.
მოვუწოდებთ ყველა დაინტერესებულ ჯგუფს, გამოიჩინონ მაღალი სამოქალაქო პასუხისმგებლობა, თავი შეიკავონ არასწორი ინფორმაციის გავრცელებისგან და საზოგადოებაში არსებული ინტერესის გათვალისწინებით, დაელოდონ გამოძიების შედეგებს, რომელიც აუცილებლად მოჰფენს ნათელს საზოგადოებისთვის ყველა დღემდე უცნობ დეტალს.
კიდევ ერთხელ ვუსამძიმრებთ გარდაცვლილი ახალგაზრდას ოჯახს.”
შეგახსენებთ, ინფორმაცია იმის შესახებ, რომ ბაჩალიაშვილის მანქანას სუსის 3 მაინქა მიჰყვებოდა უკან, “მთავარმა არხმა” პირველად 25 აგვისტოს გაავრცელა, 26 ივლისს კი ნიკა გვარამიამ გაავრცელა ინფრომაცია, რომ გაავრცელა ინფორმაცია, რომ “ბაჩალიაშვილის მოთვალთვალე ერთ-ერთი მანქანით, რომლის ნომერიცაა WW-558-VV, “შავნაბადას” სპეცდანიშნულების რაზმის ხელმძღვანელი ზვიად ხარაზიშვილი, იგივე “ხარება” გადაადგილდებოდა.” პროკურატურის განცხადება კი 27 ივლისით თარიღდება.
დღეს, 31 აგვისტოს, 7 დღის შემდეგ, სუსმა პირველად გააკეთა განცხადება და პრინციპში, მასაც არაფერი უთქვამს, გარდა იმისა, რომ ასე ყოველ დღე დადიან სუს-ის მანქანები ქუჩებში, ამ მარშრუტით!
ყოველდღიურ რა მარშუტზეა საუბარი, რა დროს, რატომ და როდემდე რჩებიან ადგილზე – ამაზე სუს-ს არაფერი უთქვამს.
გამოდის, სუს-ს არაფერი უთქვამს ახალი, მან გაიმეორა პროკურატურის განცხადება, მაშ, რაში დასჭირდა ეს 7 დღე? რატომ იმ დღეებშივე არ გააკეთა განცხადება? არ მიაჩნია საზოგადოების ინფორმირება პირველ საკითხად?
რაც არ უნდა წეროს და თქვას მედიამ, ფაქტია, საზოგადოების ნდობა არა აქვს სუს-ს! მოსახლეობა რომ ნდობას არ გიცხადებთ, ბატონებო, ეგაც მედიის ბრალია?
7 დღის მერე თუ განცხადებას გააკეთებთ რაღაც საქმეზე, წესით, იმის დეტალური ანალიზი მაინც უნდა გქონდეთ მზად, რატომ გადაადგილდებიან ერთი და იგივე მანქანები ერთი და იგივე მარშრუტით, გადაადგილდებიან თუ არა ერთი და იგივე დროს, ამ გადაადილების მერე, სად იყვნენ ამ სამი ავტომანქანის მგზავრები? სარგებლობენ თუ არა სხვა ავტომობილებით? რამდენი მოწმე არსებობს, მათი ბაზაზე ყოფნის დამადასტურებელი, რამდენ ხანში მივიდნენ ბაზაზე და დროის მიხედვით, გაჩერდნენ თუ არა გზაში სადმე?
ვინ არის სუსის სპეცდანიშნულების რაზმის ხელმძღვანელი და რას წერდა წლების წინ “ალია”, როგორ ედავებოდნენ მას 4 გვამის დამარხვას – ამ მასალას სრულად აქ ნახავთ.
კომენტარები