,,4-ში თუ მოხდება რევოლუცია და დამხობა, ისევ ბიძინას გაკეთებული იქნება… სხვა შანსი არ არსებობს, ეს ისევ ბიძინას სცენარის ნაწილი იქნება…“ – ია ფარულავა

მსახიობი ია ფარულავა ,,ტვ პირველზე”, ინტრვიუში ამბობს, რომ 4 ოქტომბერს რუსთაველის გამზირზე აუცილებლად იქნება, ოღონდ ამერიკის დროშებით ხელში, რადგან მიაჩნია, რომ რაც მეტი ამერიკული დროშა იქნება, უფრო მეტად დაცულები იქნებიან.

ია ფარულავა “მეგობარი აქტის“ მნიშვნელობაზე საუბრობს და აცხადებს, რომ “ეს არის აქტი, რაც ნიშნავს იმას, რომ საქართველოში, აუცილებლად შეიცვლება ხელისუფლება.“ ამასთან, ფარულავა ამბობს, რომ 4 ოქტომბრის ყველაზე დიდი მიღწევა იქნება, თუ სინდიდის პატიმრებს გაანთავისუფლებენ.

,,რაც შეეხება 4-ში მშვიდობიან დამხობას. მე როგორც ვიცი, ამას სჭირდება ისეთი მოსამზადებელი პირობები, ისეთი ფინანსები, რომ თუ მოხდება რევოლუცია და დამხობა, ისევ ბიძინას გაკეთებული იქნება. სხვა შანსი არ არსებობს, ეს ისევ ბიძინას სცენარის ნაწილი იქნება… ეს იქნება რაღაც დადგმული ამბავი იმიტომ, რომ ბიძინაც მიჭეჭყილი არის კედელთან რუსეთის სპეცსამსახურების მიერ, აბსოლუტურ, სრულ იზოლაციაშია, მათ შორის ინფორმაციულ იზოლაციაშიც… ეხლა რომ ამბობენ – მოსმენები, მოსმენები… ეს მოსმენები ბიძინამდე რომ მივიდეს, უნდა გაიაროს ერთი ხუთი ინსტანცია მაინც. ამ ხუთ ინსტანციაში, ხან წერტილი დაიკარგება, ხან მძიმე და სპეცსამსახურების უფროსი საბოლოოდ, არაზუსტ ინფორმაციას აწვდის… ამიტომ მინდა, 4 ოქტომბერს რაც შეიძლება ხმამაღლა ვიყვიროთ, რომ მეგობარი აქტი მალე მიიღონ კანონად…”