„ის ფაქტი, რომ მე აქ ვარ, ეს ძალიან დიდი დანაშაულია უკვე ჩემთვის. ყველაფერი ადამიანებს შორის კეთდება იმსითვის, რომ იყოს სიკეთე და არ იყოს ბოროტება. ჩემი მხრიდან, ჩემი ჯანმრთელობიდან გამომდინარე, დიდ უხერხულობას ვგრძნობ, რომ დამატებითი ყურადღება დამჭირდეს იქ, სადაც მე უნდა ვიყო, კამერაში. დამატებით კარების გაღება და ა.შ. პროცედურულადაც ჩემი მკურნალობის წესი, წამლები და კამერაში მყოფი ხალხის უხერხულობა ჩემ გამო. საათნახევარში ერთხელ მაინც უნდა ავდგე და რაღაცები გავაკეთო.
ჩემს დასაკავებლად მოსულებს ვუთხარი, რატომ ამდენი ხარჯი, თვითონ მოვიდოდი.
იქ რომ ვიყავი [აქციას გულისხმობს], იქაც უხერხულობა იყო უკვე ჩემთვის და ნახევარ საათში სახლში ვიყავი. თუ გაითვალისწინებთ, კარგი იქნება.
ვერსად მე ვერ გავიქცევი. 63 წელი აქ ვიცხოვრე.
იქნებ მე რამე მართლა დავაშავე. პასუხს ვაგებ. მაგრამ არაფერზე ხელი მე არ მომიკიდია. აბსოლუტურად არაფერზე. ესაა და ეს”, – განაცხადა სასამართლოზე ალექსანდრე გოგოლაძემ.
განცხადება გააკეთა მისმა ადვოკატმა გიორგი ჭოჭუამაც. მან მოსამათლეს სთხოვა, რომ გაითვალისწინოს ალექსანდრეს პიროვნება, ასაკობრივი, ჯანმრთელობის მდგომარეობა, მისი წარსული.
„ჩემი დაცვის ქვეშ მყოფი ნამდვილად იმყოფებოდა აქციაზე, მაგრამ ის არცერთ სტრატეგიულ ობიექტზე არ შეჭრილა. ვიდეო-ჩანაწერშიც მისი იქ ყოფნა დასტურდება. ხალხის მასა იყო დიდი და გადაადგილდებოდა მათთან ერთად.
ის არავის იცნობს, მათ შორის აქ მყოფ პირებს. არცერთი პარტიის წევრი არ ყოფილა არასდროს. ლაპარაკი ზედმეტია, რომ იცნობს ბატონ პაატა ბურჭულაძეს და სხვებს.
ის არ არის ნასამართლევი. საპენსიო ასაკს მიღწეული პირია. არანაირი სიმპატია და ანტიპატია არ გააჩნია პარტიების მიმართ. როგორც გულანთებულმა ქართველმა ჩათვალა საჭიროდ, რომ ყოფილიყო აქციაზე. მისი ჯანმრთელობის მდგომარეობა საკმაოდ მძიმეა და გადმოგცემთ ფორმა 100-ებს. მას აქვს ავთვისებიანი სიმსივნე და ყოველდღიურად იღებს მძიმე მედიკამენტებს. რამდენიმე თვის წინ გადატანილი აქვს გულის ინფარქტი. ვერ ვხვდები, რა საჭიროებას წარმოადგენს მისი პატიმრობაში ყოფნა.
მზად არის ითანამშრომლოს გამოძიებასთან და თუ დადასტურდება, რომ ჩადენილი აქვს ძალადობა ან რამე სხვა, კანონის სრული სიმკაცრით მზად არის, რომ აგოს პასუხი. პატიმრობაში ყოფნა მისი სიცოცხლისთვის ძალიან საშიში იქნება. ვერ მიიღებს სათანადო მკურნალობას. გთავაზობთ გირაოს სახით 10 000 ლარს. თუ სასამართლო საჭიროდ ჩათვლის, თავად განსაზღვროს თანხა და გამოიყენოს აღკვეთის სხვა ზომებიც.“ (ბათუმელები)
კომენტარები