პარტია „გახარია საქართველოსთვის” დეპუტატმა, გიორგი შარაშიძემ ჟურნალისტებთან 28 ნოემბერს დაგეგმილ საპროტესტო აქციაზე საუბრისას განაცხადა, რომ არ შეუერთდებიან, რადგან, გადაწყვიტეს, ყველა პოლიტიკური ინსტრუმენტით იბრძოლონ, გამოდის, პარტია თვლის, რომ აქცია არაა პოლიტიკური ბრძოლის ინსტრუმენტი. გარდა ამისა, გიორგი შარაშიძემ ხალხს 28 ნოემბრის აქციის წინ, 4 ოქტომბრის აქცია გაახსენა.
„არა, ჩვენ ვერ გვიხილავთ [28 ნოემბერს დაგეგმილ საპროტესტო აქციაზე], რადგან, იცით ჩვენ პოლიტიკური ბრძოლის გაგრძელების გადაწყვეტილება მივიღეთ – ყველა პოლიტიკური ინსტრუმენტის გამოყენებით როგორც საქართველოში, ასევე საერთაშორისო მასშტაბით. დღეს საქმის კეთების დროა. კონკრეტულად ჩვენს პოლიტიკურ ძალას აქვს თავისი კონკრეტული გამოწვევა. რაც ჩვენ მივიღეთ, მივიღეთ ღირსეულად და ვაპირებთ, ამ გამოწვევას გავუმკლავდეთ. რაც შეეხება პროტესტს, ეს ისეთი მნიშვნელოვანი თარიღია, ჩვენ მაშინაც ქუჩაში ვიყავით და წარმატებას ვუსურვებ ყველას, მაგრამ განსაკუთრებული მოლოდინები მაქვს-თქო რომ გითხრათ – სამწუხაროდ, არ მაქვს. ძირითადი მიზეზი რის გამოც არ მაქვს [მოლოდინები], არის 4 ოქტომბერი. გაიხსენეთ, რა იყო 4 ოქტომბრის მოლოდინი და რა დადგა და 28 ნოემბრის მოლოდინი რა უნდა იყოს გარდა იმისა, რომ კიდევ ბევრი ადამიანი დააფიქსირებს თავის პოზიციას, რაც მხოლოდ და მხოლოდ მისასალმებელია.
არ მგონია, რომ როგორც პარტია, პარტიულად ისე შევუერთდეთ ამ პროტესტს” – წყარო – ინტერპრესნიუსი.
“ალიამ” გაუგზავნა ერთი კითხვა გახარიას პარტიას – თვლიან, თუ არა, რომ მაგალითად, 1989 წლის აპრილის აქციები საქართველოში, პოლიტიკური ბრძოლის ინსტრუმენტი იყო? – პასუხი, ამ ეტაპზე, არ დაუბრუნებიათ.
კომენტარები