250 ლარის ერთ ჯერზე გადახდა ჩემთვისაც კი პრობლემურია – დავით ზურაბიშვილი

საზოგადოებრივ ტრანსპორტში ულიმიტო გადახდის სისტემის შემოღებას სოციალურ ქსელში პოლიტიკის ანალიტიკოსი დავით ზურაბიშვილი ეხმაურება.

ზურაბიშვილი წერს, რომ 250 ლარის ერთ ჯერზე გადახდა მისთვისაც კი პრობლემას წარმოადგენს.

„პრინციპი სწორია, მაგრამ ასეთი ფასებით ამ სწორი პრინციპის შემოღებას, ჯობია ის იყოს რაც არის.

ყველაზე რეალური შეღავათი აქ არის ერთწლიანი აბონემენტი, მაგრამ ვინც საზოგადოებრივი ტრანსპორტით რეგულარულად დადის, იმას ერთ ჯერზე 250-ის გადახდა ძალიან გაუჭირდება.

მეც სულ საზოგადოებრივი ტრანსპორტით დავდივარ, მაგრამ 250-ის ერთ ჯერზე გადახდა ჩემთვისაც კი პრობლემურია, მიუხედავად იმისა, რომ ალბათ ყველაზე ღარიბი არ ვარ ტრანსპორტით მოსარგებლეთა შორის“, – წერს დავით ზურაბიშვილი.

ცნობისთვის, 2022 წლის თებერვლიდან თბილისში საზოგადოებრივი ტრანსპორტით ერთჯერადი გადაადგილდება ძვირდება, თუმცა შემოდის აბონემენტების სისტემა, რომელიც ადამიანებს შეღავათიან ფასში გადაადგილების საშუალებას მისცემს.

თბილისის მერის, კახა კალაძის განცხადებით, დედაქალაქში საზოგადოებრივი ტრანსპორტისთვის ერთსაათიანი, ერთდღიანი, ერთკვირიანი, ერთთვიანი, სამთვიანი და ერთწლიანი ულიმიტო აბონემენტების სისტემა 2022 წლის თებერვლიდან ამოქმედდება.

რაც შეეხება ფასებს, კალაძის განმარტებით, ერთდღიანი აბონემენტი 3 ლარი ეღირება, ერთკვირიანი – 20 ლარი, ერთთვიანი – 40 ლარი, სამთვიანი – 100 ლარი და ერთწლიანი ბარათი – 250 ლარი.