2026 წლის 1 ივლისიდან საზოგადოებრივი კვების ობიექტებს მომხმარებლებისთვის სასმლის პლასტიკის ბოთლებით მიწოდება აეკრძალებათ. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
უწყების ინფორმაციით, ცვლილება პლასტიკის მოხმარების შემცირებას ისახავს მიზნად და შეეხება როგორც სასმელებს, ისე ერთჯერად პლასტიკის ჭურჭელსა და კონტეინერებს. შესაბამისად, კომპანიებს მომსახურება ალუმინის ქილებისა და შუშის ბოთლების გამოყენებით მოუწევთ.
სამინისტრო აღნიშნავს, რომ 2026 წლის 1 აპრილიდან უკვე ძალაში შევიდა ერთჯერადი პლასტიკის ნაწარმის — მათ შორის ჭიქების, თეფშების, დანებისა და საწრუპების — წარმოების, იმპორტისა და რეალიზაციის აკრძალვა.
ამასთან, უწყების განმარტებით, პლასტიკის ბოთლების სრული აკრძალვა ეტაპობრივად განხორციელდება და საბოლოოდ 2031 წლიდან ამოქმედდება, გარკვეული გამონაკლისებით დიდი მოცულობის სასმელებისთვის.
რეგულაციების შესრულებაზე კონტროლს სურსათის ეროვნული სააგენტო, გარემოსდაცვითი ზედამხედველობის დეპარტამენტი და შემოსავლების სამსახური განახორციელებენ. მოთხოვნების დარღვევა გამოიწვევს 1 000 ლარის ოდენობის ჯარიმას და პროდუქციის კონფისკაციას, განმეორების შემთხვევაში კი ჯარიმა 2 000 ლარამდე გაიზრდება.
კომენტარები