კვირას, 2 თებერვალს, 13:30-ზე, თამარ მეფის ხიდზე 1992 წელს დახვრეტილი მშვიდობიანი მომტინგეების ხსოვნისთვის შეიკრიბებიან და მათ საპატივსაცემოდ პანაშვიდს გადაიხდიან.
შეკრებილებს შეუერთდება სინდისის პატიმრის, გიორგი ტერიშვილის დედა, მარინა ტერიშვილი, რომელსაც მეორე შვილი სწორედ ამ დღეს მოუკლეს.
1992 წლის 2 თებერვალს თამარ მეფის გამზირზე, მშვიდობიანი მომიტინგეები ლეგიტიმური პრეზიდენტის, ზვიად გამსახურდიას, მხარდასაჭერად შეიკრიბნენ. ისინი უკანონო შეიარაღებულმა დაჯგუფებამ დახვრიტა და სიცოცხლე სასტიკად წაართვა მინიმუმ 33 ადამიანს, მათ შორის – 9 არასრულწლოვანს. დაჭრა 200-ზე მეტი.
კვირას, 2 თებერვალს, 13:30-ზე, თამარ მეფის ხიდზე ერთად გავიხსენოთ და კრძალვით პატივი მივაგოთ მათ ხსოვნას, ვინც სახელმწიფოებრიობისთვის იბრძოლა.
ადგილზე გადავიხდით დაღუპულთა სულის მოსახსენიებელ პანაშვიდს.
ჩვენთან ერთად იქნება მარინა ტერიშვილი, რომელსა ხსენებულ დღეს მოუკლეს 17 წლის შვილი, მამუკა ტერიშვილი. ხოლო მეორე შვილი, გიორგი ტერიშვილი, რეჟიმმა გასულ წელს, დეკემბერში, დაატყვევა მიმდინარე პროტესტისას და ამ დრომდე რჩება ციხეში.
ნიშანდობლივია, რომ 33 წლის შემდეგ, მცირე ჯგუფი კვლავაც ცდილობს ძალაუფლების მიტაცებას და არაერთი ფორმით ძალადობს როგორც მოქალაქეების სხეულებზე, ასევე საზოგადოებაზე, როგორც ჯგუფზე!
შესაძლოა, ზოგიერთი ტკივილისა და ძალადობრივი გამოცდილების დავიწყება უმჯობესი იყოს საზოგადოების, როგორც ორგანიზმისთვის. თუმცა, არსებობს ტკივილი, რომელსაც თუ არ გავუსწორეთ თვალი, არ ვუწოდეთ სათანადო სახელი და არ ვეცადეთ მის მოშუშებას, ის განუწყვეტლივ, კვლავაც და კვლავაც გამოვლინდება სხვადასხვა ფორმით ამ საზოგადოების ცხოვრებაში, სანამ ის არ იპოვის სათანადო მოშუშებასა და ლხინებას“, – წერია გავრცელებულ ინფორმაციაში.
კომენტარები