5 წლიანი პროტესტისა და 2 კვირიანი შიმშილობის შემდეგ გენერალური პროკურორი, ირაკლი შოთაძე, შვილმკვდარ მამას შეხვდა. თუმცა ,,ტვ პირველთან” საუბარში მერლონ მელტონიანი აცხადებს, რომ სამართლის აღსრულების იმედი არ აქვს.
გენინსპექციიდან მითხრეს, რომ დღეს შოთაძე შემხვდება. მინდა, მას დაველაპარაკო, სხვა არავისთან საუბარი არ გამოვიდა. უკვე ხუთი წელია, დამნაშავეების დასჯას ვითხოვ, თუმცა უშედეგოდ. ახლაც არ ვიცი, რა გამოვა, რა გადაწყვეტილებას მიიღებს შოთაძე.
ჩემს შვილს შევპირდი, რომ სამართალს ვიპოვიდი და ამას ყველანაირად შევეცდები. 2 კვირაა ვშიმშილობ და თუ დამნაშავეების დასჯა არ მოხდება, უკიდურეს ფორმას მივმართავ და წყალსაც კი არ მივიღებ – ამბობს მელტონიანი.
მერლონ მელტონიანი 2 კვირა, საქართველოს პროკურატურასთან შიმშილობს და შვილის მკვლელების დასჯას ითხოვს, ამბობს, რომ წალკაში მომხდარ სისხლიან გარჩევაში ,,ქართული ოცნების” ყოფილი დეპუტატიც მონაწილეობდა, რომელმაც პასუხისმგებლობას თავი საკუთარი გავლენებითა და ნაცნობობით აარიდა.
საუბარია 2016 წელს მომხდარ დანაშაულზე, როცა 23 წლის ანტონ მელტონიანი მოკლეს. მამის მტკიცებით, ახალგაზრდა ბიჭს ჯერ ავტომობილი დააჯახეს, შემდეგ სახლში მივიდნენ და ტყვია შუბლში დაახალეს.
მერლონ მელტონიანის თქმით, სასტიკ დანაშაულში რამდენიმე პირი მონაწილეობდა, თუმცა პოლიციამ მხოლოდ ერთი ადამიანი დააკავა.
კომენტარები