გორში, ორი მოქალაქის ცემაში ბრალდებული პოლიციელებიდან ერთ-ერთი, საბა წეველიძე 19 წლისაა – შსს-ს თანამშრომლის ადვოკატი, ზურა კაპანაძე სასამართლო პროცესზე ამბობს, რომ მისი დაცვის ქვეშ მყოფის მიმართ პატიმრობა გამოყენებული არ უნდა იქნას – „ასეთ ასაკში პატიმრობის გამოყენება მიზანშეწონილი არაა“ .
ბრალდებული არის 19 წლის, არ აქვს ნასამართლეობა, ცხოვრობს ოჯახთან, ძლიერი სოციალური კავშირები, ახალგაზრდილი ასაკი მზოლოდ ბიოლოგიური ასაკი არ არის, 19 წლის პირი წარმოადგენს რეაბილიტაციის მაღალი შესაძლებლობის მქონე ახალგაზრდას და არა იზოლაციას. პატიმრობა ასეთ ასაკში უნდა იყოს უკიდურეს შემთხვევაში გადაწყვეტილი და არა ავტომატური გადაწყვეტილება. აქტიურად თანამშრომლობდა გამოძიებასთან”, – განაცხადა ადვოკატმა.
სასამართლოზე სიტყვით ისარგებლა ალეკო ბადალოვის ადვოკატმაც – უფლებადამცველმა თქვა, რომ საქმეში მისი დაცვის ქვეშ მყოფის მიმართ ბრალეულობის დასამტკიცებლად მტკიცებულებები არასაკმარისია, ვინაიდან არ არსებობს ამ დრომდე დაზარალებულების ჩვენებები (გამოკითხვის ოქმები). მხოლოდ ვიდეოჩანაწერით კი უფლებადამცველის თქმით, არ დასტურდება ბადალოვის მხრიდან უკანონო ქმედება.
პროცესიდან გაირკვა, რომ შსს-ს თანამშრომელი ვანო მისირელი, რომელიც ამ საქმეზე ბრალდებულია და ამ ეტაპზე კლინიკაში წევს, ჩადენილს ნანობს და პატიებას ითხოვს.
როგორც მისმა ადვოკატმა განაცხადა, მისირიელი ამბობს, რომ ის შემთხვევით იქნა გამოძახებული ადგილზე.
ცნობისთვის, გორში ორი მოქალაქის ცემაში ბრალდებული პოლიციელები პატიმრობაში გაუშვეს – გადაწყვეტილება გორის რაიონული სასამართლოს მოსამართლემ, გერმანე დადეშქელიანმა გამოაცხადა.
კომენტარები