საქართველოს პროკურატურამ მძევლად ხელში ჩაგდების ფაქტზე ლ.ზ.-ს ბრალი წარუდგინა და განცხადება გაავრცელა:
საქართველოს პროკურატურამ მძევლად ხელში ჩაგდების ფაქტზე ლ.ზ.-ს ბრალი საქართველოს სსკ-ის 144-ე მუხლის მეორე ნაწილის ,,გ” ქვეპუნქტით წარუდგინა, რაც გულისხმობს ორი ან მეტი პირის მძევლად ხელში ჩაგდებას.
შინაგან საქმეთა სამინისტროს მიერ ჩატარებული გამოძიებით დადგინდა, რომ 2020 წლის 20 ნოემბერს, დაახლოებით 16:30 საათზე, ქ. თბილისში, აკ. წერეთლის გამზ. №12ა-ში მდებარე შპს „მიკრო ბიზნეს კაპიტალის” შენობაში შეიჭრა ლ.ზ. , რომელმაც ცეცხლსასროლი იარაღისა და ხელყუმბარის მსგავსი საგნების გამოყენების მუქარით, სხვადასხვა მოთხოვნების შესრულების სანაცვლოდ, შენობაში მყოფი 19 ადამიანი მძევლად აიყვანა. თავდამსხმელი შენობაში 3:30 საათის განმავლობაში იმყოფებოდა.
ლ. ზ.-ს ბრალი წარედგინა საქართველოს სსკ-ის 144-ე მუხლის მე-2 ნაწილის „გ“ ქვეპუნქტით. საქმეზე ჩატარდა არაერთი საგამოძიებო და საპროცესო მოქმედება, ასევე, ბრალდებულის ქცევიდან გამომდინარე, საქმეზე დაინიშნა ფსიქიატრიული ექსპერტიზა, რომელიც შეისწავლის მის ფსიქიკურ მდგომარეობას დანაშაულის ჩადენის დროს.
ბრალდების მხარე სასამართლოს მიმართავს შუამდგომლობით ბრალდებულის მიმართ აღკვეთის ღონისძიების სახით პატიმრობის გამოყენების თაობაზე.
როგორც ჩანს, პროკურატურას აქვს იმის მტკიცებულება, რომ ლევან ზურაბაშვილი აფეთქებით, მოკვლით, წამებით ემუქრებოდა ვინმეს იარაღის მსგავსი საგნებით – მართალია, ჩვენ რაც ვნახეთ, მსგავსი მუქარა არ იყო და არც იგრძნობოდა რომ მძევლები იყვნენ დაშინებულნი, მეტი, ვიდეოში გარკვევით ისმის ხმები, რომ მძევლები თავდამსხმელს სთხოვენ მოთხოვნები წამოაყენოს და გააჟღეროს, მაგრამ შსს-ს, როგორც ჩანს, ჩვენებაში სხვა რამ უთხრეს, ან სხვა ტიპის მტკიცებულებები გააჩნიათ, წინააღმდეგ შემთხვევაში, პროკურატურას ამ მუხლით ბრალის დამტკიცება ძალიან გაუჭირდება, თორემ, რაც შეხება ბრალის წარდგენას, ცოტა ხნის წინ, ჩვენ ისიც ვნახეთ, პირს, რომელსაც ცეცხლსასროლი იარაღი არ ჰქონდა, როგორ წაუყენეს ბრალი, ცეცხლსასროლი იარაღის უკანონოდ ტარების მუხლით.
მუხლი, რომელიც პროკურატურამ წარუდგინა ბრალდებულეს, ითვალისწინებს თავისუფლების აღკვეთას ცხრიდან თოთხმეტ წლამდე ვადით.
კომენტარები