ზურაბ ჯაფარიძე: ადგილობრივ არჩევნებში ისე მონაწილეობაზე, რომ არ დაინიშნოს ახალი საპარლამენტო არჩევნები და არ გათავისუფლდნენ პოლიტპატიმრები, თანხმობა არ არსებობს

სალომე ზურაბიშვილის საჯაროდ გაცხადებული პოზიცია იყო და არის, რომ მხარს დაუჭერს მხოლოდ იმას, რაზეც ოპოზიციური სპექტრი შეთანხმდება. გუშინ რაც მოისმინეთ, ეგ არის ის, რაზეც არსებობს თანხმობა. სხვა საკითხებზე თანხმობა არ არსებობს. მათ შორის ისეთ პრინციპულ საკითხზეც, როგორიცაა ადგილობრივ არჩევნებში მონაწილეობის ისე მიღება, რომ არ დაინიშნოს ახალი საპარლამენტო არჩევნები და არ გათავისუფლდეს ყველა პოლიტპატიმარი, – ამის შესახებ „გირჩი – მეტი თავისუფლების” ლიდერი ზურაბ ჯაფარიძე სოციალურ ქსელში წერს.

ჯაფარიძის თქმით, უკმაყოფილებას იწვევს, რომ გუშინ რაც ითქვა, ეს არ არის საკმარისი.

„თუ არსებობს რაიმე სხვა პირობები, რომლებიც შეიძლება, შესრულდეს, გარდა ამ ორისა, რაც შეიძლება, გახდეს ადგილობრივ არჩევნებში მონაწილეობის საფუძველი, მაშინ ეს პირობები საჯაროდ უნდა ითქვას (მე ჯერ ასეთი ერთიც ვერ მოვისმინე). სხვა შემთხვევაში, 2020-ის არჩევნების შემდგომი გამოცდილების გათვალისწინებით, ადამიანებში ბუნებრივად ჩნდება განცდა, რომ ვიღაცები ელოდებიან პროტესტის მილევას, რომ მერე თქვან – „ქუჩიდან მაინც არაფერი გამოვიდა და მოდი, საკრებულოების ტრიბუნას მაინც გამოვიყენებ”, ანუ არ არიან ბრძოლაში – All in.

მეტიც, არ არსებობს თანხმობა ერთიან ხედვაზე – როგორ ვაიძულებთ ამ ნაბოზ&₾ებს, დანიშნონ ახალი საპარლამენტო არჩევნები (გარდა რუსთაველის პროტესტისა). უკმაყოფილებას იწვევს, რომ გუშინ რაც ითქვა, ეს არ არის საკმარისი. აქედან გამოსავალი არის ორი: ან პარტიები თანხმდებიან მეტზე (ამას სჭირდება მეტი ერთობა), მათ შორის, პირველ რიგში, გამარჯვების ხედვაზე და სალომე ზურაბიშვილი ამას აჟღერებს, ან სალომე ზურაბიშვილი ცალმხრივად იღებს მეტ პასუხისმგებლობას საკუთარ თავზე. ეს არის სიმართლე. ყოველ ჯერზე ერთმანეთის ჭამას თუ შევეშვებით, იქნებ გამოსავალზე მეტი ვიფიქროთ. მე პირველი სცენარის მომხრე ვარ დიდი ხანია, წლებია. თუ რამე შემიძლია, ყველაფერს ვაკეთებ ამისთვის. სხვანაირად მგონია, რომ ვერ გადავრჩებით”, – განაცხადა ზურაბ ჯაფარიძემ.