“ზელენსკის დედა ებრაელია და უკრაინის პრეზიდენტს ყოველთვის მეტი მოლოდინი ჰქონდა ისრაელის მთავრობისგან.”-ისრაელში უკრაინის ელჩი

ისრაელში უკრაინის ელჩმა, ევგენი კორნიიჩუკმა იმედგაცრუება გამოთქვა უკრაინაში რუსეთის შეჭრაზე ისრაელის მთავრობის რეაგირებასთან დაკავშირებით.

ადგილობრივ არხ 12 News-თან ინტერვიუში ევგენი კორნიიჩუკმა განაცხადა, რომ უკრაინა დიდ მხარდაჭერას იღებს რიგითი ისრაელელებისგან, თუმცა ისრაელის მთავრობის ნაბიჯები გააკრიტიკა.

„ჩვენ ძალიან ცოტა ნაბიჯს ვხედავთ ისრაელის მთავრობისგან მხარდაჭერის კუთხით, აგრესორის წინააღმდეგ სანქციების დაწესების კუთხით, ჩვენი სამხედრო და თავდაცვითი საჭიროებების თვალსაზრისით და მათ იციან ამის შესახებ. დრო იწურება და სამწუხაროდ, დრო ჩვენს სასარგებლოდ არ მუშაობს. სულ ეს არის, რაც შემიძლია გითხრათ“, – აღნიშნა ისრაელში უკრაინის ელჩმა.

ევგენი კორნიიჩუკმა ასევე განაცხადა, რომ ვოლოდიმირ ზელენსკის დედა ებრაელია და უკრაინის პრეზიდენტს ყოველთვის მეტი მოლოდინი ჰქონდა ისრაელის მთავრობისგან.