“საქართველოს ახალგაზრდა იურისტთა ასოციაცია” ეხმაურება გავრცელებულ კადრებს, სადაც ჩანს, რომ რამდენიმე სამართალდამცავი ძირს დაგებულ ადამიანს ფიზიკურად უსწორდებიან. ორგანიზაცია მიმართავს მინისტრ გმოელუარს, დაუყოვნებლივ გააკეთოს განცხადება მომხდარზე და აღკვეთოს მსგავსი პრაქტიკა.
გარდა ამისა, საია მოუწოდებს სპეციალური საგამოძიებო სამსახურის უფროსს, ჩაატაროს ეფექტიანი გამოძიება 2024 წლის 13 მაისის დილით მომხდარ ძალადობის ფაქტებზე:
“ვრცელდება უმძიმესი კადრები, როგორ უსწორდებიან წრეში მოქცეულ ძირს დაგდებულ დაკავებულ ადამიანს სპეციალური დანიშნულების რაზმის თანამშრომლები რიგ-რიგობით, მასზე ანგარიშსწორების, დამცირების, ღირსების შელახვის მიზნით.
მივმართავთ:
- შინაგან საქმეთა მინისტრს, ვახტანგ გომელაურს, დაუყოვნებლივ გააკეთოს განცხადება მომხდართან დაკავშირებით და აღკვეთოს მსგავსი პრაქტიკა. წინააღმდეგ შემთხვევაში, ნათელი ხდება, რომ შინაგან საქმეთა სამინისტროს მაღალჩინოსნებისგან ტარდება შემწყნარებლური პოლიტიკა, რაც ასეთი ფაქტების პირდაპირი წახალისებაა;
- სპეციალური საგამოძიებო სამსახურის უფროსს, კოკა კაციტაძეს, ჩაატაროს ეფექტიანი გამოძიება 2024 წლის 13 მაისის დილით მომხდარ ძალადობის ფაქტებზე, ვინაიდან ამ უწყების არასათანადო რეაგირება, ასევე, თამაშობს წამახალისებელ როლს სამართალდამცავთა მიერ ჩადენილ სერიოზულ უფლებადარღვევებზე.
კომენტარები