„ნაციონალური მოძრაობის“ ყოფილმა თავმჯდომარე ნიკა მელიამ შიდაპარტიული არჩევნების შესახებ ბრიფინგი გამართა და ლევან ხაბეიშვილს გამარჯვება მიულოცა.
მელიას განცხადებით, იგი „ნაციონალურ მოძრაობაში“ რჩება და ბრძოლას აგრძელებს.
„დასრულდა არჩევნები პარტიაში, რომელსაც აქვს გამოცდილება ქვეყნის მართვისა და ამავე დროს აქვს გამოცდილება ხელისუფლების მშვიდობიანად გადაბარებისა. მე მიმაჩნია, რომ ამ არჩევნებში ძნელია ვინმეს ან გამარჯვებული ან დამარცხებული უწოდო გამომდინარე იქიდან, თუ რა მდგომარეობაში იმყოფება ჩვენი სახელმწიფო. ქვეყანას ჰყავს პოლიტპატიმრები, ქვეყნის საგარეო კურსი იცვლება რუსეთისკენ, თუმცა მე დარწმუნებული ვარ, უახლოეს მომავალში ჩვენ ყველანი ერთად გავიმარჯვებთ, ქართული სახელმწიფოს მომავალი იქნება ნათელი.
ამ ყველაფრის მიუხედავად, არჩევნები შედგა, მე გამარჯვებულს ვულოცავ, ვულოცავ ლევან ხაბეიშვილს, ვუსურებ მას პარტია ემართოს ღირსებითა და სიმართლით და მე იმედი მაქვს, რომ ის ამას მოახერხებს. მე ვფიქრობ, არავის ეჭვი არ უნდა შეეპაროს, რომ ამ ბრძოლაში ვრჩები და, რა თქმა უნდა, ვიქნები ამ ბრძოლის ავანგარდში.
მადლობა ყველას, ვინც მიიღო ამ პროცესში მონაწილეობა, მადლობა ყველა უღალატო ადამიანს, რომლებიც შეასრულებენ მომავალში ძალიან დიდ როლს ამ ქვეყნის განვითარების პროცესში. მე ვრჩები ბრძოლაში, ვრჩები პარტიაში, რომელსაც „ნაციონალური მოძრაობა“ ჰქვია იქამდე, სანამ მიხეილ სააკაშვილი არის პირადი ტყვე რუსეთის რეჟიმისა. ამის შემდეგ მე ძალიან ბევრ ადამიანთან ერთად მივიღებ გადაწყვეტილებას, რა ხარისხით უნდა ვიყო ჩართული მომავალ პარტიულ საქმიანობაში, თუმცა ხაზს ვუსვამ, რომ კიდევ უფრო მეტი ენერგიით, მოტივაციით ვიქნები ჩართული „ქართული ოცნების“ წინააღმდეგ ბრძოლის ავანგარდში. ამაში ეჭვი არავის არ შეეპაროს. ეს ასე იყოს ყოველთვის, ასე არის და ასე იქნება“, – განაცხადა მელიამ.
კომენტარები