„მთელი ეს დღეები ფარისევლურად, ანტიკონსტიტუციურად და ამორალურად აცხადებდნენ, რომ ეკლესია არის ქართული სახელმწიფოს ფუნდამენტი, მოგვიწოდებდნენ ეკრანებიდან თუ მიტინგებიდან ქრისტიანული წესით ცხოვრებისაკენ, თავად კი ადამიანს უბიძგებენ თვითმკვლელობისაკენ, რომელიც არის თურმე პიროვნების კანონიერი უფლება. აკი დედა ეკლესიაო?“ – ასე ეხმაურება პარლამენტარი რომან გოცირიძე პრემიერ- მინისტრის მიერ გუშინ გაკეთებულ განცხადებას.
„ეკლესია ხომ თვითმკვლელობას განიხილავს როგორ მიუტევებელ ცოდვას? აბა ვნახოთ ერთი, როგორი იქნება პრემიერ-მინისტრის ამ უგუნურ გამონათქვამზე ეკლესიის პასუხი.
სიცოცხლის უფლება ერთ-ერთი ფუნდამენტური და აბსოლუტური უფლებაა. ეს უფლება კანონითაა დაცული და ვინ თუ არა ქვეყნის პრემიერ-მინისტრი უნდა იყოს კანონის დაცვის გარანტი.
სიცოცხლის უფლება ერთი მხრივ სახელმწიფოს ადამიანის სიცოცხლის ხელყოფას უკრძალავს, მეორე მხრივ კი მისი სიცოცხლის აქტიურად დაცვას ავალდებულებს. ის ვინც უნდა სიცოცხლეს უნდა იცავდეს, მისი ხელყოფისადმი “გაგებით მოკიდებას” ქადაგებს,“- წერს რომან გოცირიძე სოციალურ ქსელში და აღნიშნავს, რომ არსებული ხელისუფლება ქვეყანას „კარგს არ დამართებს.“
„დეგრადირებულ ხელისუფლებასთან გვაქვს საქმე და დროზე თუ არ მოვიცილეთ თავიდან, არ დამართებენ კარგს არც ქვეყანას და არც საკუთარ თავს,“ – წერს რომან გოცირიძე.
ცნობისათვის, ასე რომან გოცირიძე პრემიერ ღარიბაშვილის მიერ გუშინ, ტელეკომპანია „იმედის“ ეთერში გაკეთებულ განცხადებას ეხმაურება.
“ფინალი არ ვიცი რა შეიძლება იყოს, ადამიანი თუ თავის ჯანმრთელობას იზიანებს, უფრო მეტი, კანონში წერია, რომ ადამიანს აქვს თვითმკვლელობის უფლება. ადამიანი თუ გადაწყვეტს, რომ თავი მოიკლას, შეუძლია მოიკლას, ამაზე სახელმწიფო ვერ აიღებს პასუხისმგებლობას,”- განაცხადა ირაკლი ღარიბაშვილმა.
კომენტარები