გიგი უგულავა „ევროპული საქართველოს“ გენერალური მდივნის თანამდებობას ტოვებს. როგორც უგულავამ ბრიფინგზე განაცხადა, პარტიის მომავალ ყრილობაზე ის აღნიშნულ თანამდებობაზე საკუთარი კანდიდატურის დაყენებას აღარ აპირებს.
„არ ვაპირებ, მომავალ ყრილობაზე ვიყარო კენჭი გენერლურ მდივნად. აღარ ვიქნები პარტიის გენერალური მდივანი. მიმაჩნია, რომ ეს არის ლოგიკური, სწორი და დროული. არ არსებობენ პარტიის ლიდერები უპირობოდ და უვადოდ. თავის დროზე, სწორედ ამას ვუთხარით უარი და მე ამ პრინციპის ერთგულ ვრჩები. მიუხედავად დრამატული გაყალბებისა, პარტიის შედეგი ბოლო არჩევნებზე იყო ძალიან ცუდი. შესაბამისად, ჩემს პასუხისმგებლობას ვიღებ და გზას ვუთმობ ადამიანებს, რომლებიც ამას გააკეთებდნენ უკეთესად.
აქტიურად ვაპირებ პოლიტიკაში დარჩენას. გარდა პარტიული ვალდებულებებისა, ბევრი ინტერპარტიული ვალდებულება მაქვს. ჩემს თავს ვხედავ სწორედ საერთო ოპოზიციურ პლატფორმაში, ამ ყველაფრის კოორდინაციაში წვლილის შეტანაში, წყლის დასხმაში, მის კულტივაციაში, საერთო ოპოზიციური გეგმის შემუშავებაში და მათ შორის, დაპირისპირების შემთხვევაში, რამენაირად მაგიდის მომრგვალებაში. ამიტომ ეს არის ის საქმე, რასაც მე ნოემბრიდან მოყოლებული ჩემი დროის 80 პროცენტს ვუთმობ. ამიტომ ვფიქრობ, სხვა პარტიების კოლეგების მხარდაჭერით, ამ საქმეს ჩვენ ერთად შევძლებთ.
მერაბ კოსტავას სიტყვების ციტირებას გავაკეთებ: „საზოგადოებას აინტერესებს, სად იქნება ეროვნული მოძრაობა და არა ის, მე სად ვიქნები ამ ეროვნულ მოძრაობაში“.
არ მგონია, დღეს პრიორიტეტული იყოს რომელიმე პარტიის თემა, დღეს პრიორიტეტულია იქნება თუ არა ოპოზიციის ერთობა, რა გეგმას დადებს ეს ერთობა, რა პოზიციები ექნება თუნდაც ადგილობრივ არჩევნებზე, ასევე მნიშვნელოვანი კომპონენტია ბოიკოტი…
სამივეს [დავით ბაქრაძის, გიგი უგულავას, გიგა ბოკერიას] გაწევა მმართველობიდან ნიშნავს სამივეს გაწევას, მაგრამ ყველა თანასწორია და ვიღაცა უფრო თანასწორი ვერ იქნება.
თუ სამიდან ერთს განსხვავებული გადაწყვეტილება ექნება, ეს მიმაჩნია, რომ პარტიისთვის ძალიან ცუდია, იმიტომ, რომ პარტიას განახლება სჭირდება და არა ერთის ორით ჩანაცვლება ან გადანაცვლება და გადმონაცვლება. რა თქმა უნდა, გიგაზე ვლაპარაკობ, მას განსხვავებული აზრი აქვს, ის თავის პოზიციას გეტყვით…”
შეგახსენებთ, “ევროპული საქართველო” დატოვეს ასევე დავით ბაქრაძემ და ზურაბ ჭიაბერაშვილმა.
კომენტარები