ვის და რატომ „უმრგვალებენ“ ხელფასებს?

ანი დვალიშვილი

იმის მიუხედავად, რომ ჯერჯერობით თოვლი არ გვაწუხებს, ზამთრის დადგომასთან ერთად, ფერმერები სერიოზული პრობლემის წინაშე დადგნენ. საქმე ის გახლავთ, რომ მათ როგორც საქონელი, ისე ფრინველი, მთლიანად ბაგურ კვვებაზე გადაიყვანეს, რაც იმას ნიშნავს, რომ პროდუქტის გაძვირება მოუწევთ. ჩვენი ინფორმაციით, ხელისუფლების წარმომადგენლებმა დიდ კომპანიებს სთხოვეს, რომ პროდუქცია ახალ წლამდე არ გააძვირონ, ახალი წლის წინა დღეებში კი…

„ახალი წელი ყველაფერს იტანს და გაძვირება არავის უკვირს. ახალ წელს გაძვირებული პროდუქტი, ნაახალწლევს მცირედით ისევ იაფდებოდა, ახლა კი ასე აღარ იქნება, გაძვირებული პროდუქტი დარჩება, რადგან სხვა გამოსავალი უბრალოდ არ არის. უკრაინიდან და რუსეთიდან შემოდიოდა საფურაჟე ხორბალი და სიმინდი, ახლა კი საფურაჟეს ვინ ჩივის, საკვებად ვარგისი ძლივს შემოდის და საფურაჟეს ისეთი ფასი აქვს, პროდუქციის გაძვირების გარდა, სხვა გზა არ გვაქვს“, – გვითხრა ერთ-ერთი დიდი კომპანიის ხელმძღვანელმა.

ბარემ ისიც ვთქვათ, რომ სოფლის მეურნეობის პროდუქტების გაძვირებასთან ერთად, გაზაფხულზე აუცილებლად გაძვირდება შხამ-ქიმიკატები და სასოფლო-სამეურნეო ტექნიკის მფლობელებმაც თქვეს, რომ გაზაფხულზე ხვნა-თესვა, საუკეთესო შემთხვევაში, 50%-ით გაძვირდება. ზოგადად, ყველაფრის გაძვირება ავტომატურად აძვირებს მუშა-ხელს და ამიტომაც არის, რიგითი მუშის დღიურმა ხელფასმა ას ლარს რომ უწია. ჰო, ერთი დღით მუშა რომ დაიქირავოთ, 100 ლარის გადახდა მოგიწევთ და თუ ადამიანი თავისი საქმის პროფესიონალია, ბევრად მეტის. საბოლოო ჯამში, ისე გამოდის, რომ ხელფასებით და პროდუქტის ფასებით ევროპას კი არ ვეწევით, ვუსწრებთ კიდევ, მაგრამ შემოსავლებით – ვერა. ამ ყველაფრის ფონზე, სულ უფრო უსუსურად გამოიყურება საჯარო მოხელეთა ხელფასები (ქვედა რგოლს ვგულისხმობთ) და ამიტომაც არის, არაერთ სფეროში, 10%-იანი მატება რომ გადაიხედა. ახლავე აგიხსნით, რას ვგულისხმობთ – მუნიციპალიტეტების პირველმა პირებმა უკვე მიიღეს მითითება, რომ თუ 10%-იანი მატების შემთხვევაში, საჯარო მოსამსახურეს მინიმუმ 100 ლარი არ ემატება, მაშინ ეს ციფრი დაამრგვალონ და ყველაზე ცოტა, სწორედ 100 ლარი დაუმატონ. ანუ, თუ ვინმეს ხელფასი 800 ლარია, 10%-იანი მატების პირობებში, 880-ის ნაცვლად, 900 ლარი გახდება, რაც ერთი შეხედვით ცუდი არ არის, მაგრამ გაძვირებული ცხოვრების ფონზე, უსუსურად და ცოტა სასაცილოდაც გამოიყურება.