„ვირლანდია“ – სახედრების პირველი ფერმა საქართველოში რძეს სამკურნალო და კოსმეტიკური დანიშნულებით აწარმოებს. პროდუქტი ძირითადად სოციალური ქსელის მეშვეობით იყიდება. როგორც ფერმის ხელმძღვანელი თორნიკე ტეფნაძე ,,კომერსანტთან“ ამბობს, სახედრები იკვებებიან მხოლოდ და მხოლოდ ბუნებრივი საკვებით, რაც იმის გარანტიაა, რომ აწარმოონ 100%-ით ნატურალური პროდუქტი.
ვირის რძე და ყველი განსაკუთრებულ ყურადღებას იპყრობს ფასითაც, 1 ლიტრი რძე 60 ლარად იყიდება, ხოლო 1 კგ. ყველის ფასი 1500 ლარს შეადგენს.
მაღალი ფასის მიუხედავად, ,,ვირლანდიის“ პროდუქტების მიმართ დიდი მოთხოვნაა, რასაც ფერმერი მის უნიკალურ თვისებებს მიაწერს და აღნიშნავს, რომ სამკურნალოდ, იმუნიტეტის გასაძლიერებლად და მრავალი სხვა დანიშნულებით ვირის რძე შეუცვლელი პროდუქტია, რომლის უნიკალურ თვისებებს მედიცინაც აღიარებს.
,,სახედრების ფერმის დაარსებამდე გავეცანით უცხოურს და ტრადიციულ ქართულ გამოცდილებას, საფუძვლიანად შევისწავლეთ ბაზარი. ცალკეული შემთხვევები მრავლადაა ხალხურ მედიცინაშიც, რასაც ამყარებს იმუნოლოგების, პედიატრების და სამედიცინო ექსპერტების კვლევები. პირველ რიგში, მთავარი გამორჩეული თვისება არის ის, რომ დედის რძესთან შესაძლებლობით ყველაზე ახლოს დგას, შეიცავს ანტიალერგიულ, ანტიმიკრობულ თვისებებს, D ვიტამინს. ნებისმიერი ადამიანისთვის, განსაკუთრებით ბავშვებისთვის ძალიან სასარგებლო პროდუქტია, რადგან მათში უფრო ხშირია რესპირატორული დაავადებები და სასუნთქი გზების ინფექციები. მიუხედავად იმისა, რომ მაღალი ფასით გამოირჩევა, ვირის რძის მიმართ დიდი მოთხოვნაა. ინტერნეტით იყიდება ძირითადად, უფრო ბავშვებისთვის ყიდულობენ და მათთვის, ვისაც სუსტი იმუნიუტეტი აქვს. დიდი მოთხოვნაა ექსპორტზეც, თუმცა იმდენად მაღალ სტანდარტს მოითხოვს, რომ ჩვენი ფერმისთვის ჯერჯერობით მისი დაკმაყოფილება სიძნელეს წარმოადგენს, ამიტომ ადგილობრივ ბაზარზე ვართ ორიენტირებული“, — ამბობს თორნიკე ტეფნაძე ,,კომერსანტთან“.
მისივე თქმით, ფერმა 2016 წელს დაარსდა. ჰყავს 35 სახედარი და აქვს 40 ჰა ფართობის საძოვარი.
მაღალი ფასი განპირობებულია ვირის დაბალი წველადობით, რომელიც დღეში სულ რაღაც 200-300 გრამ რძეს იძლევა. ფერმა დღეში საშუალოდ, ზამთრის სეზონზე 5-6 ლიტრ რძეს აწარმოებს, ზაფხულში – 4-5-ჯერ მეტს.
ერთი კილო ყველის მომზადებას კი 25 ლიტრი რძე სჭირდება, ამიტომ რძეს ფერმაში კვირაობით აგროვებენ.
რძისა და ყველის გარდა, ,,ვირლანდიაში“ იწარმოება მხოლოდ ბუნებრივ ინგრედიენტებზე და სახედრის რძეზე დამზადებული ხელნაკეთი საპნებიც.
რაც შეეხება იმას, თუ რისთვის გამოიყენება ვირის რძე და რა დადებითი თვისებები გააჩნია მას, ფერმერის განმარტებით, ვირის რძეს, ბაქტერია როგორც ასეთი არ აქვს და ის როგორც სამედიცინო მიზნით, ასევე კოსმეტიკური პრეპარატების დასამზადებლად გამოიყენება.
ფერმერი ირწმუნება, რომ სახედრის რძით რამდენიმე თვეში ათობით ჩვილი განიკურნა ყივანახველისგან, ბრონქების მძიმე დაავადებისგან, გაციებისგან.
ცნობისთვის, სახედრის რძეს საკმაოდ ხანგრძლივი და საინტერესო ისტორია აქვს. მისი სამკურნალო თვისებების შესახებ წერდნენ ფილოსოფოსი არისტოტელე, ისტორიკოსი ქსენოფონტე, ექიმი ჰიპოკრატე და იბნ სენა. იყენებდნენ ძველი რომაელები, ბერძნები, ინგლისელები და ფრანგები.
საყოველთაოდ ცნობილია, რომ კლეოპატრას ფერმაში 700 ვირი ჰყავდა და მათი რძის აბაზანებს იღებდა. სახედრის რძეს რომის პაპი ფრანცისკი სვამდა.
XIX საუკუნეში ბელგიასა და საფრანგეთში შეიქმნა ფერმები, რომლებიც ამარაგებდნენ ჰოსპიტალს სახედრის რძით ბავშვების გამოსაკვებად.
დღეისათვის სახედრის ფერმები მსოფლიოს მრავალ ქვეყანაში ფუნქციონირებს და აწარმოებენ რძეს სამკურნალო-კოსმეტიკური დანიშნულებით.
დღეისათვის სახედრის რძეზე მზადდება ყველაზე ძვირადღირებული ბავშვთა კვების პროდუქტები, შოკოლადი (შვეიცარია, ჩინეთი), სახის მოვლის საშუალებები: კრემები, საპნები, ლოსიონები და ნიღბები.
სახედრის რძე მდიდარია ვიტამინებით: A, B, C, D, E, მაგნიუმით, კალიუმით, კალციუმით, ცინკით, ფოსფორით, იმუნოგლობულინებით, ომეგა 3 და 6-ით. იგი შეიცავს ანტიალერგენებს და ანტიბაქტერიულ ფერმენტებს. მასში ხდება კოლაგენის სინთეზი და მდიდარია ანტიოქსიდანტებით.
კომერსანტი
კომენტარები