„ვირი გინდა ღობის იქით დააბი და გინდა ღობის აქეთ, ვირი მაინც ვირიაო… არაფერს შეცვლის ღარიბაშვილის გაშვება“ – გიორგი გუგავა

ლევან ჯავახიშვილი

„ალიას“ ესაუბრება „ლეიბორისტული პარტიის“ გენერალური მდივანი, გიორგი გუგავა.

– ბატონო გიორგი, პარლამენტში გამოსვლიდან ორ დღეში, ღარიბაშვილმა პრესკონფერენცია გამართა და უჩვეულოდ კონსტრუქციული და ზრდილობიანი იყო. ყველა ჟურნალისტის  კითხვას უპასუხა, ქვეყნის მტრები არ უძახია მათთვის და მადლობებიც იხადა. რა მოხდა?

– ღარიბაშვილის ეს ვითომ კონსტრუქციული ბრიფინგი, იყო ყალბი და ფარისევლური. ამით  გული მოულბო საზოგადოების იმ ნაწილს, ვინც  სახალხო პროტესტი დაიწყო და ამ ბრიფინგამდე, 20 ივნისს, ხალხის სოლიდური რაოდენობა გამოიყვანეს ქუჩაში და ასევე, ეს იყო უცხოელებისთვის გათვლილი, თითქოს, ხელისუფლებისგან  აგრესია არ მოდის და ჟღურტულა მტრედები არიან ღარიბაშვილიც და დანარჩენებიც. ეს არსებითად არაფერს ცვლის. მთავარია საქმე და არა პრემიერის შეცვლილი რიტორიკა. ღარიბაშვილმა იგივეს გათამაშება სცადა, რაც თავის დროზე ბიძინა ივანიშვილმა, 2019 წელს, საპრეზიდენტო არჩევნების მეორე ტურის წინ რომ გამოგვეცხადა და იტირა პირდაპირ ეთერში, ოღონდ ახლა ხმა მიეცით სალომე ზურაბიშვილს და რაც აქამდე არ გაგვიკეთებია, ერთ წელიწადში გაგიკეთებთო. უბრალოდ, სხვა და სხვა მასშტაბის აფერისტები არიან ივანიშვილი და ღარიბაშვილი. ღარიბაშვილი ცდილობს გული მოულბოს ამომრჩეველს, რომელიც აღარ დარჩათ, გარდა სახელმწიფო სამსახურში დასაქმებული ადამიანებისა. „ქართული ოცნების“ უამრავი ამომრჩეველი იდგა რუსთაველზე გამართულ ორივე აქციაზე. ჩამოენგრათ მთელი ის პიარ-კონსტრუქცია, რაზეც აქამდე ჰქონდათ აგებული მთელი პოლიტიკა – დაპირისპირება, ურთიერთ ქიშპი, პოლიტიკური და საზოგადოებრივი ჯგუფების პოლარიზაცია. ხელოვნურად აღვივებდნენ შუღლს და ამაზე იდგნენ, ჩვენ თუ არ ვიქნებით, არიქა, აგერ მოდიან „ნაცები“ და ყოფას გიტირებენ ყველასო. ახლა ცდილობენ, უნიჭოდ შემრიგებლის როლი მოირგონ. თუმცა, ეს არ უშველით და არც გამოსდით.

– ხმები ვრცელდება, რომ ირაკლი ღარიბაშვილის გადაყენებას აპირებს ბიძინა ივანიშვილი და თუ ეს ხმები რეალურია, მართალია, რა შეიძლება იყოს მიზეზი? ივანიშვილის რა დავალება ვერ შეასრულა სათანადოდ ღარიბაშვილმა, რომ ის პრემიერობიდან გაუშვას?

– კახელებს აქვთ ასეთი გამოთქმა, ვირი გინდა ღობის იქით დააბი და გინდა ღობის აქეთ, ვირი მაინც ვირიაო. არაფერს შეცვლის ღარიბაშვილის გაშვება, სხვა ღარიბაშვილი მოვა და ყველაფერი უცვლელი დარჩება. ერთხელ გაუშვა ივანიშვილმა ღარიბაშვილი, მერე დააბრუნა და არსებითად შეიცვალა რაიმე? არც არაფერი. 6 პრემიერი ყავდა 10 წელიწადში „ქართულ ოცნებას“, მაგრამ არც ერთს არაფერი შეუცვლია ქვეყნისა და ხალხის სასიკეთოდ, ყველა ივანიშვილის მსახური, მისი ნების აღმსრულებელი იყო. ახლაც, ერთ მარიონეტს ჩაანაცვლებს მეორეთი და ყველაფერი უცვლელი დარჩება. კი, თუ ვინმე გაუშვებს ღარიბაშვილს, ეს ივანიშვილი იქნება. რა ხდება და რა მოხდა მათ შორის, ეს არ ვიცი. უკმაყოფილოა თუ არა მისით ივანიშვილი, ვერც ამაზე ვიტყვი ვერაფერს. თუ გადააყენა, მერე გამოჩნდება მიზეზებიც. ამ სიტუაციიდან გამოსავალს ასე ვუყურებ.  ღარიბაშვილის, მინისტრების და  სხვა თანამდებობის პირების შეცვლა შედეგს არ მოიტანს, ბიძინა ივანიშვილს უნდა ჩამოერთვას ხელისუფლების მართვის ბერკეტები. გამოსავალია ივანიშვილის სანქცირება ამერიკისა და ევროკავშირის მიერ. ამაზე ვმუშაობთ და პრაქტიკულად, პროცესი დაწყებულია. სანქცირების მერე ივანიშვილს გამოეცლება ფინანსური საფუძვლები, რომლითაც მართავს და კვებავს ამ მარიონეტებს. ამის მერე უნდა ჩატარდეს რიგგარეშე არჩევნები. ჩვენ ვართ საპარლამენტო რესპუბლიკა, მთავრობის ფორმირებას ახდენს პარლამენტი. აქედან გამომდინარე, აუცილებელია რიგგარეშე არჩევნები, რომ ის უმრავლესობა, რომელიც „ქართულ ოცნებას“ ჰყავს, ხელიდან წაართვა და  ამის მერე, სამართლიანი არჩევნების გზით, ხელისუფლებაში მოვა კოალიციური მთავრობა, ეს გარდაუვალია, ვერც ერთი პარტია ვერ აიღებს ხმების იმ რაოდენობას, რომ უმრავლესობით მოვიდეს ხელისუფლებაში. მრავალპარტიული პარლამენტი და შესაბამისად, მთავრობა გვეყოლება.