ვინც “გადამგდებ ოცნებასთან” სადილებზე და ვახშმებზე ვაჭრობს, ხალხი არ აინტერესებს”

„20 ივნისის შემდეგ „ოცნებამ“ ხალხი გადააგდო და ვინც დღეს მათთან ერთად კაბინეტებში ჯდება, მათ არც ხალხი აინტერესებს და არც მათი მონაპოვარი… ხალხის ინტერესების კულუარულად განხილვა ამორალური მგონია“, – ამის შესახებ პარტია „ტრიბუნას“ დამფუძნებელი დავით ჭიჭინაძე აცხადებს.

„რაც ხალხმა საკუთარი ღირსებით და სისხლის ფასად მოიპოვა, იმაზე არ შეიძლება არც მთავრობასთან ივაჭრო კაბინეტებში და არც სადილებზე გაცვალო უცხოელ პარტნიორებთან, რადგან პროპორციული არჩევნები კაბინეტებში, სადილებზე და ვახშმებზე არ მიუღიათ! 20 ივნისის შემდეგ „ოცნებამ“ ხალხი გადააგდო და ვინც დღეს მათთან ერთად კაბინეტებში ჯდება, მათ არც ხალხი აინტერესებს და არც მათი მონაპოვარი, ისინი მხოლოდ საკუთარი გადარჩენის საშუალებას ეძებენ – ერთმანეთთან ვაჭრობით და უცხოელი პარტნიორის გადაწყვეტილებით, ვის მხარეს აირჩევს, რადგან ზუსტად იციან, რომ ხალხი მათ მხარეს აღარასოდეს დადგება. ამიტომ, ხალხის ინტერესების კულუარულად განხილვა ამორალური მგონია!

მითუმეტეს, რომ ამ შეხვედრებზე პრაქტიკულად ყველაფერი „ევროპული საქართველოს“ დომინაციით მიმდინარეობს. პარტიის, ვისაც ხალხის ყველაზე ნაკლები მხარდაჭერა აქვს. ანუ, არავის აქვს იმის უფლება, რომ მთავარი მამოძრავებელი ძალა – ხალხი – თამაშიდან გაიყვანოს.

ნებისმიერმა პოლიტიკურმა ძალამ ჯერ ხალხს უნდა ჰკითხოს, აქვთ თუ არა მათ სადმე წასვლის და მათი სახელით, მათთვის გადაწყვეტილების მიღების უფლება და მხოლოდ ამის შემდეგ დასხდნენ, თუნდაც სადილებზე და თავის წარმოჩენას შეეცადონ. დღევანდელ რეალობაში კი, ერთი რამ იკვეთება, რომ ხალხი, ამ ე.წ. პოლიტიკური ელიტისთვის“ მხოლოდ საარჩევნო მასალაა და მეტი არაფერი. მოკლედ, ჩვენი პოლიტიკური ელიტის კლასი კი ძალიან დაბალია, მაგრამ სამაგიეროდ, ხალხია ბრძენი და ეს შემოდგომაზე გამოჩნდება“