“ნაციონალური მოძრაობის” ლიდერ ნიკა მელიასთვის აღკვეთის ღონისძიების დამძიმების საკითხს მოსამართლე ნინო ჩახნაშვილი განიხილავს.
ჩახნაშვილის გვარი ფიგურირებს რამდენიმე გახმაურებულ საქმეში. 20-21 ივნისის მოვლენების დროს დაზარალებულ 16 პირს, მათ შორის, მაკო გომურს მან დაზარალებულის სტატუსი არ მიანიჭა. მოქალაქეების დაზარალებულად ცნობას სასამართლოში საია ითხოვდა, რომელიც ამბობს, რომ სასამართლოს აღნიშნული გადაწყვეტილება უსაფუძვლოა.
ნინო ჩახნაშვილი თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიის მოსამართლედ 2019 წლის ივლისიდან დაინიშნა, სადაც თელავის რაიონული სასამართლოდან გადმოიყვანეს და მას დაეწერა განსახილველად ე.წ. ხაზარაძე-ჯაფარიძის საქმე.
იუსტიციის უმაღლესი საბჭოს არამოსამართლე წევრი ანა დოლიძე მაშინ ამბობდა, რომ იუსტიციის საბჭომ ჩახნაშვილი თბილისის საქალაქო სასამართლოში კონკურსის გარეშე გადმოიყვანა.
მოსამართლე ნინო ჩახნაშვილმა 2019 წლის 31 დეკემბერს ძალაში დატოვა აღკვეთის ღონისძიება — პატიმრობა ნიკა რურუას მიმართ.
მან ასევე ორთვიანი წინასწარი პატიმრობა შეუფარდა სააკაშვილის საპრეზიდენტო ბიბლიოთეკაში ხანძრის გაჩენაში ბრალდებულ ბადრი ქათამაძეს.
მისი ბოლო დეკლარაციის მიხედვით, მისი წლიური სახელფასო სარგო შეადგენდა 62 703 ლარს.
მისი მეუღლე გელა აშაძე თბილისის სააპელაციო სასამართლოში მუშაობს და მისი წლიური სახელფასო სარგო 14 789 ლარია.
2019 წელს ნინო ჩახნაშვილმა 5 000 დოლარის ღირებულების ავტომანქანა იყიდა, ხოლო მისმა მეუღლემ, გელა აშაძემ ბათუმში სასტუმროს ნომერი, აპარტამენტი შეიძინა 39,3 კვ.მ.
ნიო ჩახნაშვილმა 2004 წელს დააამთავრა ნ. დუმბაძის სახელობის თბილისის ჰუმანიტარული ინსტიტუტის იურიდიული ფაკულტეტი
სამართალმცოდნეობის სპეციალობით.
2004 წელს ჩააბარა პროკურატურის მუშაკთა საკვალიფიკაციო გამოცდა, მოგვიანებით გაიარა სხვა საკვალიფიკაციო გამოცდები, მათ შორის ადვოკატის და მოსამართლის.
2006 წელს გაიარა სასამართლო სისტემაში სტაჟირება და 2007 წლიდან სასამართლოში მუშაობის უწყვეტი სტაჟი აქვს, თუმცა მხოლოდ 2018 წელს დაინიშნა თელავის რაიონული სასამართლოს მოსამართლედ.
კომენტარები