ცოტა ხნის წინ ცნობილი გახდა, რომ თბილისის ზღვის ჰოსპიტალში კორონავირუსის პირველი შემთხვევა გამოვლინდა.

„პრაიმტაიმი“ დაწესებულების კლინიკურ დირექტორს, კახა ბეროზაშვილს ესაუბრა.

„ვადასტურებ, რომ ჩვენს კლინიკაში დადასტურდა კორონავირუსის პირველი შემთხვევა. ამის შესახებ ინფორმაცია ჩვენთვის დაახლოებით საათნახევრის წინ გახდა ცნობილი.

მას აქვს საზღვარგარეთ მოგზაურობის ისტორია. პაციენტი 60 წლამდე მამაკაცია და გუშინ მომართა ჩვენს კლინიკას საერთო სისუსტის, სიცხისა და ყელის ტკივილის სიმპტომით.

მას აქვს პნევმონია. იმყოფება ბოქსირებულ პალატაში და მიმდინარეობს მკურნალობა. მისი ჯანმრთელობის მდგომარეობა სტაბილურია.“ – განაცხადა კახა ბეროზაშვილმა.

კლინიკური დირექტორის თქმით, თბილისის ზღვის ჰოსპიტალი საკარანტინო სივრცედ არ გამოცხადებულა. ამჟამად კლინიკა დაუზუსტებელ ცხელების მქონე პაციენტებს იღებს. საჭიროების შემთხვევაში კი ანალიზებს ლაბორატორიაში აგზავნის.

„ხვალ დილით ლუგარის ლაბორატორიაში კიდევ რამდენიმე პაციენტების ანალიზები გადაიგზავნება. კონკრეტულად რამდენი პაციენტის პასუხს გადავგზავნით ამის თქმა გამიჭირდება, რადგან შესაძლოა ღამის განმავლობაში კიდევ დაგვემატოს პაციენტები.“ – აცხადებს ჰოსპიტალის კლინიკური დირექტორი.

შეგახსენებთ, საღამოს ინფექციურ საავადმყოფოსთან გაკეთებული განცხადების თანახმად, ქვეყანაში კორონავირუსით ინფიცირებული სულ 110 პაციენტი იყო. თბილისის ზღვის ჰოსპიტალში გამოვლენილი კიდევ ერთი შემთხვევით კი საერთო ჯამში 111 პაციენტი გამოდის.