ძმები ფეიქრიშვილების სახელი საქართველოში სხვადასხვა კრიმინალურ საქმეში წლებია ფიგურირებს. 34 წლის დავით და გიორგი (გოგა) ფეიქრიშვილები წარსულში მრავალჯერ არიან ნასამართლევი.
1986 წელს დაბადებული გიორგი ფეიქრიშვილის ერთ-ერთი ბოლო დაკავება შსს-მ 2016 წელს განახორციელა. 2016 წლის 3 და 4 სექტემბერს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარმა სამმართველომ თბილისში სამი ერთმანეთთან კავშირში მყოფი პირი დააკავა – გიორგი ყანჩაველი, ნოდარ ნიშნიანიძე და გიორგი ფეიქრიშვილი.
ამ სამი პირის დაკავება დაემთხვა სოსო ჯოხაძის მკვლელობას, რომელიც ე.წ კრიმინალური ავტორიტეტის გია ჯოხაძის ძმა იყო. ტყუპი ძმა და ჯოხაძის მკვლელობაში ბრალდებული ბადრი (ბადუკა) ნათობაძე ახლო მეგობრები იყვნენ და არსებული ინფორმაციით, ფეიქრიშვილებსა და ჯოხაძეებს დაპირისპირებაც ჰქონდათ.
გიორგი ფეიქრიშვილმა დაკავების შემდეგ ისიც განაცხადა, რომ ჯოხაძის მკვლელობის შემდეგ მის სახლთან მუდმივად იდგნენ პოლიციის მანქანები, თუმცა, მკვლელობასთან კავშირს ის კატეგორიულად უარყოფდა.
ამასთან, ცნობილია ისიც, რომ ფეიქრიშვილთან ერთად შსს-ს მიერ დაკავებული გიორგი ყანჩაველი ჯოხაძის მკვლელობის დღეს ბადუკა ნათობაძესთან ერთად იმ მანქანაში იჯდა, რითაც ნათობაძე გადაადგილდებოდა.
შსს იუწყებოდა, რომ 2016 წლის სექტემბერში, ფეიქრიშვილის საცხოვრებელი ბინის ჩხრეკისას სამართალდამცველებმა ამოიღეს ავტომატური ცეცხლსასროლი იარაღი ერთი მჭიდით, 30 ცალი ვაზნა და ერთი შეკვრა, სავარაუდოდ, ნარკოტიკული ნივთიერება, რომელზეც დანიშნულია ქიმიური ექსპერტიზა.
ფეიქრიშვილი 2015 წლის ოქტომბერშიც დააკავეს ვაჟა-ფშაველაზე, საკუთარ სახლთან. მას იარაღის უკანონო ტარება ედებოდა ბრალად, თუმცა მაშინ მისი ოჯახის წევრები ირწმუნებოდნენ, რომ გოგა ფეიქრიშვილს პოლიციამ იარაღი ჩაუდო. ის 9 თვის განმავლობაში იხდიდა სასჯელს, 2016 წლის 30 ივნისს კი ციხიდან გამოვიდა.
გიორგი ფეიქრიშვილის სახელი უკავშირდება გია უდესიანს, რომელიც თავის მხრივ “ნაციონალების” “ზონდერ-ჯგუფების” მეთაურად” მოიხსენიებოდა.
რაც შეეხება დავით ფეიქრიშვილს, მისი სახელი ფიგურირებს ე.წ მაზავშიკების საქმეში, რა დროსაც დავით გაგნიძე, გიორგი დემეტრაძე და კახა მისირელი დააკავეს.
დავით ფეიქრიშვილს საფეხბურთო ჩემპიონატზე, ე.წ “მაზით” 140 000 დოლარი ჰქონდა მოგებული. თანხის გადახდა მის მოვალეს გაუჭირდა და დახმარებისთვის ქურდული სამყაროს „ავტორიტეტის“ ვახტანგ (ვატო) ყიფიანს მიმართა.
ყიფიანი უკრაინიდან თბილისში დავით ფეიქრიშვილს დაუკავშირდა. მაშინ გავრცელდა ყიფიანისა და ფეიქრიშვილის საუბრის ჩანაწერიც, სადაც ისინი თანხაზე საუბრობდნენ. ყიფიანი ფეიქრიშვილს ეუბნებოდა, “ქურდული წესებით”, ასეთ დროს მოგებული თანხის 20 პროცენტი სად უნდა წასულიყო. ფეიქრიშვილი კი ყიფიანს პასუხობდა, რომ ეს წესები, უკვე აღარ არსებობს.
ძალოვნებმა გიორგი დემეტრაძე, დავით გაგნიძე და კახა მისირელი 2010 წლის ივლისში, თბილისში, ჭავჭავაძეზე დააკავეს. მანქანა სამრეცხაოსთან რამდენიმე წუთით გააჩერეს და სავარაუდოდ, ფეიქრიშვილს ელოდნენ, რომლისთვისაც თანხა უნდა გადაეცათ. სამართალდამცველებმა დაკავებულებისგან 40 700 დოლარია ამოიღეს და ეს თანხა, გამოძიების მტკიცებით, ფეიქრიშვილს ეკუთვნოდა. ვატო ყიფიანს კი დამატებით, ფეიქრიშვილის მოგებული თანხა, 30 000 დოლარი უკრაინაში ჰქონდა ამოღებული.
მაშინ დავით ფეიქრიშვილი პროკურატურის საპროცესო გარიგებას დასთანხმდა და ციხიდან მალევე გათავისუფლდა.
ცნობილი გახდა, რომ ძმები ფეიქრიშვილები ბოლო პერიოდში თბილისში დაცვის თანხლებით გადაადგილდებოდნენ. სავარაუდოდ, ძმებს ჰქონდათ ინფორმაცია მათზე შესაძლო თავდასხმის შესახებ.
სახელმწიფო უსაფრთხოების სამსახურმა ძმების – გიორგი და დავით ფეიქრიშვილების განზრახ მკვლელობის მომზადების ბრალდებით 7 პირი დღეს დააკავა, მათ შორის საქართველოს და უკრაინის მოქალაქეები არიან.
სუს-ის ინფორმაციით, გამოძიებამ დაადგინა, რომ თბილისელი ძმების ლიკვიდაცია უკრაინაში დაიგეგმა და ის ცეცხლსასროლი იარაღისა და სპეციალური დისტანციურად მოქმედი ასაფეთქებელი მოწყობილობის გამოყენებით უნდა განხორციელებულიყო.
ambebi.ge
