,, ვიღაცამ თქვენი პენსია, თქვენი ხელფასი, თქვენი გზის რემონტის ფული, თქვენი თავდაცვის გაძლიერების ფული, თქვენი შვილების განათლების ფული აიღო და ჯიბეში ჩაიდო” – ლევან ღამბაშიძე

ფილოსოფოსი ლევან ღამბაშიძე:

,,ძვირფასო მასწავლებლებო, მაღაზიების თანამშრომლებო, ხელოსნებო, პენსიონერებო, მძღოლებო, საჯარო მოხელეებო, შემწეობის მიმღებებო, გლეხებო, ვეტერანებო…. ძვირფასო ხელფასიდან ხელფასამდე მცხოვრებო ხალხო, პატიოსანო, მშრომელო, კეთილსინდისიერო ადამიანებო…

გაცნობებთ, რომ დღეს რეჟიმმა დააკავა ე რ თ ი. ადამიანი, რომელსაც ბრალად სდებს ექვსასრაღაცა მილიონი დოლარისა და ოცდარაღაცა მილიონი ევროს გათეთრებას.

როგორ ფიქრობთ, ვისი ფულოს გათეთრებაზეა საუბარი? მართალია: თქვენი ფულის გათეთრებაზე. ვიღაცამ თქვენი პენსია, თქვენი ხელფასი, თქვენი გზის რემონტის ფული, თქვენი თავდაცვის გაძლიერების ფული, თქვენი შვილების განათლების ფული აიღო და ჯიბეში ჩაიდო.

ექვსას მილიონ დოლარად ყველა სკოლას გაუკეთებ საუკეთესო ბიბლიოთეკას; საქართველოს ჯარს უყიდი უახლეს აღჭურვილობას, თუშეთში გაიყვან ელექტროენერგიას, გაზრდი პენსიებს, დაანგრევ ავარიულ კორპუსებს და ახლებს ააშენებ…

აი ამ ყველაფრის მოგვარებისათვის განკუთვნილი თქვენი ფული ვიღაცამ აიღო და ჯიბეში ჩაიდო.

და ეს ერთი კი არ არის, ერთერთია. ამ ერთს დააბრალებენ კაცობრიობის ყველა ცოდვას, მაგრამ ზუსტად იგივე გარყვნილებაში ცხოვრობს რეჟიმის ყველა მაღალჩინოსანი. ერთმანეთს ტყეებს, პენტჰაუსებსა და მანქანებს ჩუქნიან, ყიდულობენ უძვირეს ჩანთებს, ფეხსაცმელებს და სამკაულებს, აწყობენ ენითაღუწერელად პომპეზურ წვეულებებს…

და ამ ყველაფრის ფულს იხდით თქვენ.

გთხოვთ გაიაზროთ, რომ იმიტომ კი არ ცხოვრობთ ასე, რომ საქართველო ღარიბი ქვეყამაა და სხვანაირად ვერ იქნება. ე რ თ მ ა კაცმა ექვსასრაღაცა მილიონი დოლარი იშოვნა, რანაირადაა ღარიბი ქვეყანა. უბრალოდ რეჟიმს უნდა რომ თქვენ გეგონოთ, რომ თქვენთვის უკეთესი ცხოვრება არ არსებობს. უნდა, რომ გეგონოთ, რომ ცვლილებას აზრი არ აქვს.

არა და აქვს. როგორ შეიძლება რამე არ შეიცვალოს, თუკი ამ მავნებელ ხალხს სახელმწიფო ბიუჯეტს ჩამოვაშორებთ და სამართლიანად გავანაწილებთ ამ თანხას მოსახლეობის საჭიროებებზე? როგორ შეიძლება ეს არ გინდოდეთ?

გთცოვთ გაიაზრეთ, რომ თქვენ უკეთეს ცხოვრებას არა მხოლოდ იმსახურებთ, არამედ ეს თქვენი უფლებაცაა. გაიაზრეთ, რომ ოთხიმილიონი ადამიანი არ უნდა ვშრომობდეთ 24 საათი, რათა ვიღაც ერთმა ექვსასი მილიონი დოლარი მოგვპაროს. გაიაზრეთ, რომ ჩვენ ერთი ადამიანისა და მასზე მომუშავე რამდენიმე ასეული ადამიანის ბედნიერებისათვის არ დავბადებულვართ.

ამას თუ გაიაზრებთ, იქნებ გაბრაზდეთ კიდეც და თუ ეს მოხდება, იქნებ ერთად რამის შეცვლაც კი გამოგვივიდეს.“