აფრიკის დასახლებაში, სადაც თბილისის მერიამ შენობების დემონტაჟი დაიწყო, ვითარება უკიდურესად დაიძაბა. ადგილზე სამართალდამცველები არიან მობილიზებულები, მოსახლეობა კი ცდილობს მძიმე ტექნიკას მათი საცხოვრებელი სახლების დანგრევის საშუალება არ მისცეს.
დაკავებულია 9 პირი, რამდენიმე ადამიანმა სხეულის მძიმე დაზიანებები მიიღო, მათ შორის არის ორსული ქალი, რომელიც კლინიკაში გადაჰყავთ.
“მოვიდეს კალაძე და დაველაპარაკებით, რომელი საუკუნეა, ამერიკელებზე ჰყიდიან მიწებს და ჩვენ არ გვაძლევენ საშუალებას ჩვენს მიწებზე ვიცხოვროთ” – აცხადებს აქციის ერთ-ერთი მონაწილე.
“უცბად მოვიდნენ არჩევნების შემდეგ, გაფრთხილება არ ყოფილა, რატომ არჩევნებამდე არ დაიწყეს აწიოკება? ვთხოვ გამოგვიყონ თავშესაფარი, რომ ბავშვებს სახლი და დასაძინებელი ადგილი ჰქონდეთ”, – განაცხადა ერთ-ერთმა ადგილობრივმა.
მანამდე კი მერიამ გაავრცელა განცხადებ, სადაც ნათქვამია, რომ მუნიციპალურმა ინსპექციამ სამგორის რაიონში, აფრიკის დასახლებაში უკანონოდ აშენებული რამდენიმე შენობა-ნაგებობის დემონტაჟი დაიწყო. მათი ინფორმაციით, ჩატარებული ინსპექტირების შედეგად, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა, რომელზეც თბილისის მუნიციპალურმა ინსპექციამ მიმდინარე წელს მოკვლევა დაიწყო. მოკვლევის შედეგად დადგინდა, რომ აღნიშნულ მისამართზე შენობა-ნაგებობები უნებართვოდ იყო განთავსებული. მუნიციპალურმა ინსპექციამ კანონის შესაბამისად, თბილისის მუნიციპალიტეტის მერის დავალებით, მათი დემონტაჟის პროცესი დაიწყო.
კომენტარები