რესპუბლიკური პარტიის ლიდერი, დავი ბერძენიშვილი აცხადებს, რომ ოპოზიციის მხრიდან მიხეილ სააკაშვილის ციხიდან ორ დღეში გამოხსნის შესაძლებლობას ვერ ხედავს.
მისი თქმით, ნაცმოძრაობის მიერ 21 დეკემბერს დაანონსებული საპროტესტო აქცია, ოპოზიციური პარტიის მხრიდან ძალის დემონსტრირებაა.
“შერიგებისკენ ზოგიერთი განცხადება უფრო მოზომილია. ეს განცხადება არის სხვა ტიპის, სადაც დემონსტრირებაა, რომ 21-ში იყოს შემაძრწუნებელი მიტინგი, რომელიც ამ ხელისუფლებას შეაზანზარებს – ძალის დემონსტრირების ფონზე, ხდებოდეს „ნაციონალური მოძრაობის“ და სხვა პოლიტიკური ჯგუფების ერთობლივი შეტევა ამ მორიგებისთვის. საარტილერიო შეტევა შემდეგი საუბრისთვის, უკეთესი პოზიციების მოპოვება მოლაპარაკებისთვის.
ვერ ვხედავ ოპოზიციის მხრიდან მიხეილ სააკაშვილის ორ დღეში, ორ კვირაში, გამოხსნის შესაძლებლობას. გადასცემენ თუ არა უკრაინას, ლიმონივით გამოწურულ, პოლიტიკურად დაზარალებულ მიხეილ სააკაშვილს, გაუშვებენ თუ არა უკრაინაში, არ ვიცი, უკრაინას ახლა გაცილებით უფრო მნიშვნელოვანი და სერიოზული პრობლემები აქვს. მიხეილ სააკაშვილმა რეპუტაციულად მოიგო ჩამოსვლით, თქვა, რომ აქ ვარ, არ მეშინია ციხის, ყოჩაღად შეხვდა ციხეს – ამით ბევრი გააკვირვა, ვინც მას იცნობდა, რადგან სხვანაირად იცნობდნენ, ან საერთოდ არ იცნობდნენ და სხვა წარმოდგენა ჰქონდათ. მეორე მხრივ, მას შესაძლოა მეტი მოლოდინი ჰქონდა, ამდენი წლის განმავლობაში ქვეყნიდან მოწყვეტილს. მას ბევრჯერ უთქვამს, რომ მოსახლეობის 2/3-ს უნდა ჩემი ჩასვლა საქართველოშიო, ამ დროს 2/3-ს არ უნდა მიხეილ სააკაშვილის ხელისუფლებაში ყოფნა, არა თუ ერთპიროვნულ ხელისუფლად, სხვებთან ერთად ხელისუფლებაში ყოფნა”, – განაცხადა ბერძენიშვილმა პალიტრანიუსის ეთერში.
შეგახსენებთ, რომ საქართველოს მესამე პრეზიდენტის, მიხეილ სააკაშვილის გათავისუფლების მოთხოვნით, 21 დეკემბერს ნაციონალური მოძრაობა რუსთაველის გამზირზე აქციას გამართავს.
კომენტარები