2026 წლის 22 თებერვალს სსიპ მუნიციპალური განვითარების ფონდმა (MDF) გაავრცელა ინფორმაცია, რომ სოფელ ველისციხის ცენტრალური ნაწილის რეაბილიტაციის პროექტზე მოქმედი ხელშეკრულება შეწყდება, ხოლო დარჩენილი სამუშაოებისთვის ახალი ტენდერი გამოცხადდება. საუბარია კონტრაქტორ კომპანიებთან, შპს „ინსისთან“ და შპს „ჯავასთან“ გაფორმებულ ხელშეკრულებაზე.
ფონდის განცხადებაში ნათქვამია:
„რამდენიმე დღის წინ ფონდმა მიიღო გადაწყვეტილება, შეწყვიტოს ხელშეკრულება სოფელ ველისციხის ცენტრალური ნაწილის რეაბილიტაციის პროექტის კონტრაქტორ კომპანიებთან, შპს „ინსისა“ და შპს „ჯავას“ ერთობლივ საწარმოსთან. გადაწყვეტილების მიზეზი, არაერთი გაფრთხილების მიუხედავად, კომპანიების მიერ ნაკისრი ვალდებულებების შეუსრულებლობა გახდა.“
პროექტის ისტორია და ვადები
ველისციხის რეაბილიტაცია 2022 წელს დაიწყო აზიის განვითარების ფონდის (ADB) მხარდაჭერით. ურბანული განახლებისთვის თავდაპირველად გამოიყო 30,386,078 ლარი, თუმცა ხელშეკრულების საბოლოო ღირებულებად 29,704,033.82 ლარიგანისაზღვრა.
ADB საქართველოში ახორციელებს ქალაქების მდგრადი განვითარების პროგრამას (Livable Cities), რომლის მიზანია რეგიონებში ინფრასტრუქტურის განახლება, დასახლებების რეაბილიტაცია და ადგილობრივი მოსახლეობისთვის ცხოვრების პირობების გაუმჯობესება.
მუნიციპალურმა განვითარების ფონდმა ხელშეკრულება ორ კომპანიასთან ტენდერის გზით გააფორმა. პირობების მიხედვით ხელშეკრულების გაფორმებიდან 28 დღეში იწყებოდა შესრულების ვადის ათვლა, ხოლო სამუშაოები 20 თვეში უნდა დასრულებულიყო.
სახელმწიფო შესყიდვების პორტალის მონაცემებით, ხელშეკრულება 2021 წლის 23 დეკემბერს გაფორმდა. შესაბამისად, სამუშაოების დასრულების ვადად 2023 წლის აგვისტო–სექტემბერი განისაზღვრა.
ამას ადასტურებს ადასტურებს 2022 წლის 21 ნოემბერს „ქართული ოცნების“ მიერ გამოქვეყნებული პოსტი, სადაც აღნიშნული იყო, რომ სარეაბილიტაციო სამუშაოები 2023 წელს დასრულდებოდა. მსგავსი ინფორმაცია გაავრცელა გურჯაანის მუნიციპალიტეტმაც, რომლის განცხადებითაც „ველისციხის რეაბილიტაცია აქტიურად მიმდინარეობდა“, ხოლო დასრულების თარიღად 2023 წლის ზაფხული დასახელდა.
თუმცა, აღნიშნული პირობა ვერ შესრულდა.
შეცვლილი ვადები და ახალი ტენდერი
2024 წლის მარტში აზიის განვითარების ფონდმა ანგარიში გამოაქვეყნა, სადაც ველისციხეში სარეაბილიტაციო სამუშაოების დასრულების ახალ სავარაუდო თარიღად 2024 წლის 31 მაისი იყო მითითებული.
იმავე საკითხზე 2024 წელს „ფლანგვის დეტექტორმა“ საჯარო ინფორმაცია გამოითხოვა. MDF-დან მიღებული პასუხით, სამუშაოები 2024 წლის IV კვარტალში უნდა დასრულებულიყო. მიუხედავად ამისა, ველისციხის რეაბილიტაცია არც 2024 წელს დასრულდა და არც 2025 წელს.
სახელმწიფო შესყიდვების ვებგვერდის მონაცემებით, იმ კომპანიებისთვის, რომლებსაც ხელშეკრულება შეუწყდებათ, უკვე გადახდილია ხელშეკრულების საერთო თანხის 73%, ანუ 21,707,276 ლარი.
შედეგად, რეაბილიტაცია, რომელიც 2022 წელს დაიწყო და ხელშეკრულებით 20 თვეში უნდა დასრულებულიყო, დღემდე არ დასრულებულა. უფრო მეტიც, 2026 წელს საჭირო გახდა ახალი ტენდერის გამოცხადება იმ კომპანიის შესარჩევად, რომელიც დარჩენილ სამუშაოებს სრულად, ხარისხიანად და ვადაში შეასრულებს.
კომენტარები