თეთრი სახლი ტექნოლოგიურ კომპანიებზე „თავდასხმას“ გეგმავს.
ვაშინგტონი სანქციების ახალ პაკეტს ამზადებს, რომლის სამიზნე ის კომპანიებია, რომლებიც რუსეთის სამხედრო და დაზვერვის სამსახურებს პროდუქციას აწვდის. – ამის შესახებ ინფორმაციას Wall Street Journal წყაროზე დაყრდნობით ავრცელებს.
აშშ ახალი სანქციების პაკეტს მომავალ კვირას წარადგენს. როგორც ვაშინგტონში აცხადებენ, შეიარაღების წარმოების პროცესში რუსეთი დიდწილად დამოკიდებული იყო დასავლურ და საერთაშორისო ტექნოლოგიებზე.
სასანქციო სიაში ხვდება Серния Инжиниринг, რომელიც რუსული სპეცსამსახურებისთვის იარაღის მიწოდებით არის დაკავებული და Сертал-ი, რომელიც აღჭურვილობასა და ტექნოლოგიებს რუსეთის ფედერაციის შეიარაღებული ძალებისთვის ამზადებდა. აშშ სანქციებს დაუწესებს კიდევ 4 კომპანიას, რომელთა დახმარებითაც Серния და Сертал აწარმოებენ შესყიდვებს. შეზღუდვები შეეხება ამ კომპანიების მიერ ნებისმიერი ფინანსური ოპერაციის განხორციელებას, რაც ამ კომპანიებს საზღვარგარეთ ბიზნესის წარმოების შესაძლებლობას წაართმევს.
თეთრ სახლში ასევე აცხადებენ, რომ გეგმავენ „თავდასხმას“ ტექნოლოგიურ კომპანიებზე, რომლებიც ხელს უწყობენ პუტინს უკრაინაში ომის წარმოებაში. მათ შორის არიან კომპანიები НИИ Вектор, რომელიც აწარმოებდა თანამგზავრებს რადიოლოკაციური დაზვერვისთვის, Микрон – რუსეთში მიკროსქემების მსხვილი მწარმოებელი, Т-Платформы, რომელიც დაკავებულია სუპერ კომპიუტერებით.
ასევე განიხილება სანქციები iGrids-ის მიმართ, რომელიც ავითარებს პროგრამულ უზრუნველყოფას ენერგოსისტემების ავტომატური მართვის სისტემებისთვის რუსეთის ფედერაციაში.
შეგახსენებთ, რუსეთის ჯარის უკრაინაში შესვლიდან უკვე 31 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
კომენტარები