პროსახელისუფლებო „რუსთავი 2“-ის ყოფილი გენერალური დირექტორი, ვაკო (ვარლამ) ავალიანის ხელფასი ტელეკომპანიაში მუშაობის დროს თვეში 39 ათას ლარზე მეტი იყო. ამის შესახებ მან ჩაწერა დეკლარაციაში, რომელიც კატარში ელჩად მუშაობის გამო 3 იანვარს შეავსო, დოკუმენტი კი დღეს, 4 მარტს გასაჯაროვდა. – დეკლარაციას ,,რადიო თავისუფლება” ავრცელებს.
დეკლარაციის მიხედვით, ვაკო ავალიანმა „რუსთავი 2“-ში (სს მედია ჰოლდინგ) მუშაობის დროს ჯამში 400 ათას ლარამდე თანხა აიღო:
- როგორც დირექტორმა – 314 213 ლარი (8 თვეში);
- როგორც კონსულტანტმა – 83 329 ლარი (2 თვეში).
ვაკო ავალიანი და მისი ცოლი, თამარ ქაფიანიძე ფლობენ ორ მიწის ნაკვეთს თბილისსა და დუშეთის მუნიციპალიტეტში, ასევე სამ ბინას თბილისში და ერთს ბათუმში.
გარდა ამისა, მისი ცოლის სახელზეა რეგისტრირებული 2025 წელს 185 000 ევროდ შეძენილი ბინა იტალიაში.
„რუსთავი 2“-ის გენერალურ დირექტორად მუშაობის დროს ვაკო ავალიანმა შეიძინა „ტოიტოა რავ 4“. 2024 წელს ამ ავტომობილში მან 119 000 ლარი გადაიხადა.
თანხის დიდი ნაწილი ვაკო ავალიანის ცოლის საბანკო ანგარიშებზეა თავმოყრილი. დეკლარაციის შევსების მომენტისთვის ცოლ-ქმარს საბანკო ანგარიშებზე ჰქონდათ:
26 ათას ლარზე მეტი;
21 ათას ევროზე მეტი;
36 ათას კატარის რეალზე მეტი (26 ათას ლარზე მეტი).
გარდა ამისა, ისინი ნაღდი ფულის სახით ინახავენ:
18 ათას ევროს;
11 ათას ლარს.
„რუსთავი 2“-ის ყოფილი დირექტორი, ვაკო ავალიანი კატარში ელჩად 2025 წლის ნოემბერში დაინიშნა. ის ტელეკომპანიის დირექტორი იყო 2021 წლიდან. (რადიო თავისუფლება)
კომენტარები