სადგურის მოედნის მიმდებარედ გაჩენილი ხანძრის გამო, განცხადებას ავრცელებენ მიმდებარე ტერიტორიაზე მდებარე კლინიკები – „თოდუას კლინიკა“ და „ჰელსიკორი“.
“ვაგზლის მიმდებარე ტერიტორიაზე გაჩენილი ხანძრის გამო, კლინიკაში ჩატარდა შესაბამისი ღონისძიებები, პაციენტები გადანაწილებულნი არიან თბილისის მასშტაბით სხვადასხვა კლინიკებში და არიან უსაფრთხოდ”, – იტყობინება “ჰელსიკორი” და აღნიშნავს, რომ დღეისთვის დაგეგმილი გეგმური პროცედურები კლინიკაში აღარ ჩატარდება.
დამატებითი ინფორმაციისთვის, საავადმყოფოს ადმინისტრაცია დაინტერესებულ პირებს კლინიკის ცხელ ხაზზე დაკავშირებას ურჩევს.
“კლინიკის ცხელი ხაზი: 574 060 533
საგანგებო სიტუაციების მართვის სამსახური: 112
ჯანდაცვის სამინისტროს ცხელი ხაზი: 1505
დამატებითი კითხვების შემთხვევაში მოგვწერეთ აქ და მყისიერად გიპასუხებთ”, – აღნიშნულია “ჰელსიკორის” განცხადებაში.
“ამ დროისთვის, კლინიკაში მოთავსებული არცერთი პაციენტისა და მედპერსონალის ჯანმრთელობას საფრთხე არ ემუქრება. სამედიცინო გუნდი უწყვეტ რეჟიმში აგრძელებს ზრუნვას სტაციონარში მყოფი თითოეული პაციენტის საჭიროებებზე.
ე.წ. “ვაგზლის ბაზრობის” ტერიტორიაზე გაჩენილი ხანძრის გამო, დღეს ამბულატორიული პაციენტების მიღება შეჩერებულია, რაც ქუჩის მიმდებარე ტერიტორიაზე არსებული დაკვამლიანებით არის გამოწვეული.
“თოდუას კლინიკა” აღჭურვილია უმაღლესი სტანდარტის უსაფრთხოების სისტემებით, რაც უზრუნველყოფს შიდა სივრცეებში დაკვამლიანების თავიდან აცილებას.
ამ ეტაპზე, მიმდინარეობს ყველა შესაბამისი სამუშაო, რომელიც განსაზღვრულია უსაფრთხოების პროტოკოლით.
ვაგრძელებთ ზრუნვას კლინიკაში მოთავსებული სტაციონარული პაციენტების უსაფრთხოებასა და ჯანმრთელობაზე. საჭიროების შემთხვევაში, შეუფერხებლად მოგემსახურებათ “თოდუას კლინიკის” დიღმისა და ვერის ფილიალები”, – აღნიშნულია კლინიკის განცხადებაში.
ამ დროისთვის, ხანძარი უკვე ლიკვიდირებულია.
კომენტარები