უფალს ვეხვეწები გასცეს პასუხი ჩემი შვილის გამო. ყველა მკვლელი სათანადოდ უნდა დაისაჯოს, რომ ხვალ და ზეგ მკვლელობა აღარ მოხდეს, – ამის შესახებ გუდაურში მოკლული თამაზ გორთამაშვილის დედამ, მერი გორთამაშვილმა სასამართლო პროცესის დასრულების შემდეგ განაცხადა, სადაც ნაფიცმა მსაჯულებმა გუდაურში მკვლელობის საქმეზე ბრალდებული მერაბ კობიაშვილი უდანაშაულოდ ცნეს.
„უფალთან რომ წარდგება და ეტყვის ჩემს მიერ შექმნილი კაცი რატომ მოკალიო, რა პასუხი უნდა გასცეს მაგ არაკაცმა? ასეთი მკვლელები შეიძლება ქვეყანაზე იყვნენ? რატომ წაიყვანა 19 წლის ბიჭი და სცემა, იმის გამო დაიწყო ყველაფერი, სად არიან, რატომ არ ამბობენ ამას?“, – აღნიშნა მერი გორთამაშვილმა.
თამაზ გორთამაშვილი 2020 წლის 16 თებერვალს, გუდაურში მოკლეს, ერთი პირი კი დაჭრეს. აღნიშნულთან დაკავშირებით, სამართალდამცავებმა მერაბ კობიაშვილი დააკავეს. კობიაშვილს მკვლელობას, მკვლელობის მცდელობასა და ძალადობას ედავებოდნენ.
ამასთან, პროკურატურამ მერაბ კობიაშვილის მიმართ ჯგუფურად განხორციელებული ძალადობის ფაქტზე ბრალი 6 პირს წარუდგინა და მათი საქმე ცალკე წარმოებად გამოიყო.
კომენტარები